दुगुनागढीबाट कांग्रेसको १ सय ५० नेता कार्यकर्ता माओवादी केन्द्रमा प्रवेश

दुगुनागढी । भोटेकोशी गाउँपालिका– ३ दुगुनागढीका १ सय ५० जना नेकपा (माओवादी केन्द्र) मा प्रवेश गरेका छन् ।

नेकपा (माओवादी केन्द्र) भोटेकोशी गाउपालिका– ३ को अधिवेशनमा कांग्रेस परित्याग गरी अगुवा कार्यकर्ता तथा समाजसेवी रुद्रबहादुर पौडेलको नेतृत्वमा ६० जना सहित अन्य भेगबाट कांग्रेसको क्रियाशिल सदस्य प्राप्त युवाहरुको समूह गरि १ सय ५० जना माओवादी केन्द्रमा प्रवेश गरेका हुन् ।

पार्टी प्रवेश गर्दै रुद्रबहादुर पौडेलले नेकपा (माओवादी केन्द्र) ले गरेका असल कामले आफूहरुलाई आकर्षित गरेको बताए । ‘यहाँभन्दा अघि म आबद्ध रहेको पार्टी भन्दा नेकपा (माओवादी केन्द्र) ले नै जनताको आवाज उठाउँदै जनपक्षिय काम गरिरहेकोले हामीले सल्लाह गरेर नै सामुहिक रुपमा माओवादी केन्द्रमा आबद्ध हुने अठोट गरेका हौं’, पौडेलले भने । नवप्रवेशीहरुलाई नेकपा (माओवादी केन्द्र) बाग्मती प्रदेश सचिवालय सदस्य तथा जिल्ला सह–इन्चार्ज सरल सहयात्री पौडेल, भोटेकोशी गाउँपालिका अध्यक्ष राजकुमार पौडेललगायतले स्वागत गरेका थिए ।

अधिवेशनले निमा सोना शेर्पाको अध्यक्षतामा २९ जनाको कमिटी निर्वाचित गरेको छ । सो कार्यक्रमलाई सम्बोधन गर्दै नेता पौडेलले दुगुना लगाएत ३ नम्बर वडाको समग्र विकास गर्नको लागि माओवादी बाहेक अरु विकल्प नरहेको बताए । ‘समग्र क्षेत्रको विकासको ज्योति भनेकै माओवादी हो’, उनले भने– ‘तर त्यो ज्योतिलाई निस्तेज पार्न पाए आफूले ब्रम्हलुट गर्न बाटो खुल्छ भनेर केहि केहि लागिरहेका छन् । तर त्यो उनीहरुको दिवाश्वप्न मात्रै हो ।’ कांग्रेस र एमालेबाट अब विकासको सम्भावना नरहेको पौडेलले दावी गरे ।

अधिवेशनमा बोल्दै भोटेकोशी गाउँपाकिकाको अध्यक्ष राजकुमार पौडेलले पैदल मार्ग, दुगुनागढी, बोक्चेनको बाटो लगायतका क्षेत्रको विकास माओवादीको नेतृत्वमा स्थानीय सरकार बनेपछि भएको बताए । ‘नेकपा (माओवादी) केन्द्रले भोटेकोशीमा जनताको हक र हितमा काम गरिरहेको छ’, पौडेलले भने– ‘विकासको अग्रमोर्चामा पार्टीले पालिकालाई उल्लेख्य सहयोग गरिरहेको छ ।’ उनले वडा नं. ३ को सम्पूर्ण विकासलाई ब्यवस्थित गर्नको लागि आफू तयार रहेको समेत बताए ।