अन्तराष्ट्रिय श्रमिक महिला दिवस भव्य रुपमा मनाईने

चौतारा । अखिल नेपाल महिला संघ (क्रान्तिकारी) सिन्धुपाल्चोकले आसन्न अन्तराष्ट्रिय श्रमिक महिला दिवस भव्य रुपमा मनाउने जनाएको छ ।

चौतारामा शनिबार बसेको संघको बैठकले ८ मार्च (फागुन २४) गते विश्वभर मनाईने अन्तराष्ट्रिय श्रमिक महिला दिवसलाई भव्य बनाउने निर्णय गरेको हो । जिल्लाको मूख्य शहरी क्षेत्र चौतारा, बाह्रविसे, खाडीचौर र मेलम्चीमा वृहत कार्यक्रम गरी दिवस मनाउने निर्णय गरिएको जिल्ला अध्यक्ष अम्बिका नेपालले जानकारी दिईन् ।

बैठकले सदस्यता वितरण गर्ने, इकाई तथा सेल र टोल समिति गठन गर्ने, वडा सम्मेलन र पालिका सम्मेलन गर्ने, चैत्र मसान्तभित्र जिल्ला सम्मेलन गर्ने, ‘महिला जागरण’ नामक मुखपत्र र २०७९ सालको भित्तेपात्रो प्रकाशन गर्ने जिल्ला सचिव तारा रानाले बताईन् । उनले महिला संघलाई टोलटोलमा पुर्याई महिलाहरुको हकहितको सम्बद्र्धनमा लाग्ने योजना रहेको सुनाईन् ।

बैठकलाई सम्बोधन गर्दै अनेमसंघको केन्द्रिय सचिवालय सदस्य तथा नेकपा (माओवादी केन्द्र) बाग्मती प्रदेश सचिवालय सदस्य अमृता नेपालले सम्पूर्ण जनवर्गीय संगठन मध्ये महिला पहिलो हुने दौडमा भाग लिन निर्देशन दिईन् । उनले महिलाहरु पार्टीको गतिविधिमा अग्रभागमा उभिने र प्रभावकारी काम गर्नेमा विस्वास समेत व्यक्त गरिन् ।

बैठकमा नेकपा (माओवादी केन्द्र) का बाग्मती प्रदेश सचिवालय सदस्य एवम् जिल्ला अध्यक्ष गोविन्द पराजुलीले आशन्न स्थानीय तहको निर्वाचनमा महिलाहरुवाट मूख्य पदमा दावेदारी प्रस्तुत गरी जनविस्वास लिएर विजयी हुने खेलमा सहभागि हुनुपर्नेमा जोड दिएका थिए ।