सिन्धुका ५ क्याम्पसमा निर्वाचन ५ मा सर्वसम्मत, अखिल (क्रान्तिकारी) पहिलो

चौतारा । सिन्धुपाल्चोकका १२ वटा क्याम्पस मध्ये ५ वटा क्याम्पसमा स्ववियु पदाधिकारी चुन्न निर्वाचन भएको छ ।

जलबिरे भ्याली क्याम्पस जलबिरेको स्ववियु सभापतिमा अखिल (क्रान्तिकारी) का अच्यूत अधिकारी विजयी भएका छन् । अधिकारीले नेबिसंघका सुदेश ढकाललाई ३० मतले पछि पार्दै विजयी भएका हुन् । कुल मतदाता १ सय ९१ मध्ये १ सय ८१ मतदाताले मतदान गरेका थिए । अधिकारीले ७९ मत पाउदा नेबिसंघका ढकालले ४९ मत पाएका छन् । त्यस्तै अर्का प्रतिस्पर्धी अनेरास्ववियुका दिनेश गोलेले ४६ मत पाए । अखिल (क्रान्तिकारी) बाटै सचिवमा बिक्रम भट्टराई, कोषाध्यक्ष दीपा सापकोटा र सदस्यहरुमा रिता बि.क, कृष्णकुमारी गोतामे र अस्मिता श्रेष्ठ निर्वाचित भएका छन् ।

जुगल क्याम्पस साँगाचोकमा पनि अखिल (क्रान्तिकारी) को प्यानलले जितेको छ । क्रान्तिकारीबाट सभापतिमा सुदर्शन अर्याल, मन्जु नेपाल, कोषाध्यक्षमा मनिला लामा, सदस्यमा सुस्मिता तामाड, अनिस गिरी र कुसुम तामाड बिजयी भएका हुन् । समानुपातिकतर्फ जमुना श्रेष्ठ दिपा राना, मनिका भुजेल, विष्णुमाया राना र सर्मीला गिरी निर्वाचित भएका हुन् ।

यता मेलम्ची भ्याली क्याम्पस हेलम्बु गाउँपालिका ४ मा सम्पन्न स्ववियु निर्वाचनमा वामपन्थी विद्यार्थीहरुको संयुक्त प्यानल विजयी भएका छन् । सभापतिमा एमाले निकट अनेरास्ववियुका पवनकुमार लामिछाने ७० मत ल्याएर विजयी भए । उनका प्रतिस्पर्धी नेविसंघका रणजित कार्कीले ५१ मत प्राप्त गरे । यस्तै, सचिवमा अखिल क्रान्तिकारीका राजन गिरी ७२ मत ल्याएर विजयी भए । कोषाध्यक्षमा नेकपा एकीकृत समाजवादीका प्रदिप गुरागाईं ७२ मत ल्याएर विजयी भए । सदस्यमा गोकुल लामिछाने ७१, सरिता जोती ६८ मत ल्याएर विजयी भए । सुन्तली तामाङ निर्विरोध भईन् । सदस्यमा निर्वाचित तामाङ र ज्योति अखिल क्रान्तिकारीका हुन भने लामिछाने एमाले निकट अनेरास्ववियुका हुन् ।

अरनिको कलेज बाह्रबिसेमा नेविसंघबाट सभापति सन्दीप बस्नेत निर्वाचित भएका छन् । सचिवमा र कोषाध्यक्षमा अनेरास्ववियुले जितेको छ । सचिवमा सजान तामाङ र कोषाध्यक्षमा सबिना कार्की विजयी भएका हुन् ।

त्यस्तै ईन्द्रावति क्याम्पस मेलम्चीमा गोला प्रथाबाट सभापतिमा अनेरास्ववियुका किसन दुलाल बिजयी भएका छन् । नेविसंघ दुलाल र नेविसंघका उम्मेद्वार सरोज बस्नेत दुबैले १ सय ८ मत प्राप्त गरेपछि पुनः मतगणना गरिएको थियो । अन्तिममा दुबै पक्षबाट गोला प्रणालीबाट सभापति चुनिने सहमति भएपछि अनेरास्ववियुका किसन दुलाल विजयी भएका छन् । दुई सय ४२ मत खसेकोमा अन्य सचिव, कोषाध्यक्ष र सदस्य पदमा भने अनेरास्ववियु क्रान्तिकारी, अखिल र राप्रपाको गठबन्धन विजयी भएको छ ।

५ वटामा निर्विरोध
यसअघि ५ क्याम्पसमा मनोनयन दर्ताकै दिन सर्वसम्मत पदाधिकारी निर्वाचित भइसकेका थिए । जिल्लाका प्रमुख चौतारा बहुमुखी क्याम्पसमा क्रान्तिकारीका अमृत श्रेष्ठ सभापतिमा निर्वाचित भएका हुन् । अनेरास्ववियु, नेविसंघ र समाजवादी विद्यार्थी संगठनले अन्य पदहरू लिएर सर्वसम्मत रूपमा स्ववियु निर्वाचित भएका छन् । सुनकोशी बहुमुखी क्याम्पसमा एमाले निकट अनेरास्ववियुकी हिरा थामी सभापतिमा निर्वाचित भइन् भने अखिल क्रान्तिकारी र नेविसंघले अन्य पदहरू लिए ।

ककलिङ क्याम्पस ठूलोपाखरमा अखिल क्रान्तिकारीका लक्ष्मण घिसिङ सभापति छानिए । त्यस्तै, ठोकर्पा सामुदायिक क्याम्पसमा नेविसंघकी सरस्वती जिसी सभापतिमा निर्वाचित भएकी छन् । ती दुबै क्याम्पसमा अनेरास्ववियु लगायतका क्रियाशिल सबै विद्यार्थी संगठनका प्रतिनिधिहरू रहेका छन् । उता सिन्धु भ्याली क्याम्पस भोटेचौरमा नेविसंघका सुरज चौलागाईं सभापतिमा निर्विरोध निर्वाचित भएका छन् ।

यो परिणामसँगै सिन्धुपाल्चोकमा अखिल (क्रान्तिकारी) ले ४, अनेरास्ववियुले ३ र नेविसंघले ३ वटा क्याम्पसमा जित हासिल गरेको छ । दशमध्ये ४ वटा क्याम्पसमा जित हासिल गरेसँगै अखिल (क्रान्तिकारी) जिल्लाकै पहिलो संगठनको रुपमा दरिएको छ । अभयानन्द र पाँचपोखरी क्याम्पसमा भने विद्यार्थी न्यून भएकाले स्ववियु निर्वाचन नै हुन सकेन ।