त्रिभूवन आर्मीका महतराले जिते ट्रेल रेसको उपाधी

दुगुनागढी । दोस्रो लिस्तीकोट दुगुनागढी माउण्टेन ट्रेल रेसको उपाधि त्रिभूवन आर्मी क्लबका देवराज महतराले हातपारेका छन् ।

१ सय १८ प्रतिस्पर्धीलाई पछि पार्दै २ घण्टा १४ मिनेट ३० सेकेण्डमा २४ दशमलव पाँच किलोमिटरको दुरी पार गरी खुला तर्फको प्रतियोगितामा महतराले प्रथम भएका हुन् । उपाधि हातपारेसँगै उनले नगद एक लाख १० हजार रुपैंयासहित मेडल र प्रमाणपत्र प्राप्त गरे । त्यस्तै २ घण्टा १६ मिनेट १० सेकेण्डमा निर्धारित दुरी पार गरेर त्रिभूवन आर्मी क्लबकै श्रीकास राई दोस्रो हुन सफल भए । राईले नगद ७५ हजार रुपैंयासहित मेडल र प्रमाणपत्र प्राप्त गरे । २ घण्टा २१ मिनेटमा निर्धारित दुरी पार गरेर तेस्रो भएका सुमन कुलुङ राईले नगद ५५ हजार रुपैंयासहित मेडल र प्रमाणपत्रमा चित्त बुझाए । उनले प्रथम लिस्तीकोट दुगुनागढी माउण्टेन ट्रेल रेसमा प्रथम स्थान हातपारेका थिए ।

प्रतियोगितामा भीमबहादुर गुरुङ चौथो, राजेन्द्र राई पाँचौं र याङदेव राई छौठौं स्थान प्राप्त गर्न सफल भए । उनीहरुलाई क्रमसः ४० हजार ३० हजार र २० हजार नगद प्रदान गरिएको थियो ।

त्यस्तै महिलातर्फ सिन्धुपाल्चोक हेलम्बुकी नितु तामाङले ३ घण्टा १७ मिनेटमा निर्धारित दुरी पार गरी प्रथम हुन सफल भईन् । प्रथम भएकी तामाङले नगद ६० हजार रुपैंयासहित मेडल र प्रमाणपत्र प्राप्त गरिन् । सिन्धुपाल्चोक त्रिपूरासुन्दरीकी भगवती खत्री दोस्रो भईन् । उनले नगद ३५ हजार रुपैंयासहित मेडल र प्रमाणपत्र प्राप्त गरिन् । तेस्रो स्थान हातपारेकी दोलखाकी पासादिकी शेर्पाले २० हजार पुरस्कारसहित मेडल र प्रमाणपत्र पाईन् ।

सिन्धुपाल्चोक जिल्लातर्फ इन्द्रावती गाउँपालिकाका गणेशसिंह ठकुरी, पाँचपोखरी थाङ्पाल गाउँपालिकाका राहुल तामाङ र मेलम्ची नगरपालिकाका श्यामकुमार तामाङ क्रमसः प्रथम, द्वितीय र तृतीय हुन सफल भए । उनीहरुले क्रमसः नगद ३० हजार, २० हजार र १५ हजार रुपैंया प्राप्त गरे ।

प्रतियोगितामा विजेता हुनेहरुलाई जिल्ला न्यायाधिस चन्द्रप्रकाश तिवारी, श्री नम्बर २६ का सहायक रथी ज्योतिन्द्र महत, प्रमुख जिल्ला अधिकारी वेदनिधि खनाल र भोटेकाशी गाउँपालिकाका अध्यक्ष राजकुमार पौडेलले पुरस्कार वितरण गरेका थिए । पुरस्कार वितरण समारोहलाई सम्बोधन गर्दै सहायक रथी महतले प्रतियोगिताले सहासिक खेलकूदको विकाससँगै सैनिक र नागरिकबीचको सम्बन्ध प्रगाढ बनाउन महत्वपूर्ण भूमिका खेल्ने विश्वास व्यक्त गरे ।

समारोहमा भोटेकाशी गाउँपालिकाका अध्यक्ष पौडेलले सामरिक महत्वको ऐतिहासिक दुगुनागढीको पहिचान नयाँ पुस्तामा हस्तान्तरण र पर्यटकीय गन्तव्यको रुपमा चिनाउन टेल रेसको आयोजना गरिएको बताए । भोटेकोशी गाउँपालिकाको मूख्य प्रायोजन र नेपाली सेना गोरख बक्स गणको सहकार्य तथा व्यवस्थापनामा गत वर्षदेखि ट्रेल रेसको आयोजना हुँदै आएको छ । प्रतियोगितालाई सिल्क ग्रुप, सिन्धुपाल्चोक उद्योग वाणिज्य संघ, नेपाल हिमालयन सीमापार वाणिज्य संघ, ब्ल्याक हर्स सुज, क्षमादेवी ग्रुप, लक्ष्मी बैंक, बाह्रविसे नगरपालिकाले सहयोग गरेका थिए ।

नेपाल तिब्बतबीच भएको युद्ध ऐतिहासिक एवम् सामरिक स्थल दुगुनागढी र लिस्तीमाईको संरक्षण, प्रचारप्रसार एवम् पर्यटकीय प्रबद्र्धनमा टेवा पुर्याउनका लागि ट्रेल रेसको आयोजना गरिएको जनाईएको छ । कार्यक्रममा सहयोग पुर्याउने संघ संस्था र व्यक्तित्वहरुलाई कदरपत्र र मायाको चिनो प्रदान गरिएको थियो ।