घिमिरेद्वारा गाउँपालिका अध्यक्षमा उम्मेद्वारी घोषणा

चौतारा । आउँदो वैशाख ३० गते हुने स्थानीय तहको चुनावका लागि उम्मेदवारी दिनेहरुको संख्या बढ्दै जान थालेको छ ।

चुनावको माहौल तात्तिदै जाँदा जुगल गाउँपालिकाका– ५ का युवा ध्रुबराज घिमिरेले उम्मेद्वारीको घोषणा गरेका छन् । पेशाले इन्जिनियर उनले जुगल गाउँपालिकाको अध्यक्ष पदको लागि स्वन्तत्र उम्मेद्वारी घोषणा गरेका हुन् ।

‘आधारभुत काम गरौ, पार्टीभन्दा माथि जुगलवासी’ भन्ने मूल नारा लिएर उनी चुनावी मैदानमा होमिएका छन् । एक विज्ञप्ती जारी गर्दै आफूले स्वतन्त्र रुपमा अध्यक्ष पदमा उम्मेदवारी दिने घोषणा गरे । ‘अब युवाहरु आफ्नो ठाउँ बनाउन जुट्नु पर्छ’, उनले भने– ‘क्षमता हुनेहरुले स्थानीय सरकारको नेतृत्व गरी विकासको खाका कोर्नुपर्छ भन्ने उद्देश्यले उम्मेद्वारी दिने घोषणा गरेका हुन् ।’

स्थानीय युवामाझ लोकप्रिय छवि बनाएका घिमिरे जुगल गाउँपालिकाकै पहिलो सिभिल इन्जिनियर पनि हुन् । उनीसँग देशका विभिन्न जिल्लाहरुमा सिभिल इन्जिनियर र प्रोजेक्ट मेनेजरको रुपमा कार्य सम्पादन गरेको अनुभव छ । घिमिरेले जुगल गाउँपालिकाकै रत्न राज्य माविमा केही समय अध्यापन समेत गरेका थिए ।