माओवादीले बनायो मतदाता रक्षा दल

चौतारा । नेकपा (माओवादी केन्द्र) सिन्धुपाल्चोकले आसन्न निर्वाचनलाई लक्षित गरेर विभिन्न पालिकामा मतदाता रक्षा दल गठन (भी फोर्स) गठन गरेको छ ।

शुक्रबार बलेफी, सुनकोशी र इन्द्रावती गाउँपालिकामा रक्षा दल गठन गरिएको हो । बलेफीमा भएको कार्यक्रमलाई सम्बोधन गर्दै नेकपा माओवादी केन्द्रिय सदस्य माधव सापकोटाले यो फोर्स कसैप्रति जाइनलाग्ने तर परिआए बाँकी पनि नराख्ने बताए । ‘हामी कसैकाप्रति जाइलाग्दैनौ, आए बाँकी राखिन्न’, उनले भने ।

आसन्न निर्वाचनमा बलेफी माओवादीको आशाको केन्द्र रहेको भन्दै ‘गठबन्धन हुँदा पनि बलेफी नछाड्ने, बलेफी छोडेर गठबन्धन नगर्ने’ बताए । गठबन्धनका लागि उपाध्यक्ष भने हाल खाली राखिएको उनले बताए । जिल्लामा चार हजार बढीको संख्यामा हरेक वडा र गाउँ/नगरपालिकामा भीफोर्स परिचालन हुने, यसबाट मतदाताको सुरक्षा हुने उनको भनाई थियो ।

कार्यक्रमलाई केन्द्रिय सदस्य अमृता नेपाल, बलेफी गाउँपालिकाका माओवादीका सर्वसम्मत प्रस्तावित अध्यक्षका उमेदवार गंगाबहादुर तामाङ लगायतले सम्बोधन गरेका थिए ।

त्यस्तै सुनकोशी गाउँपालिकामा पनि मतदाता रक्षा दल गठन गरिएको छ । वाईसिएल नेपालको केन्द्रीय संयोजक सुमन देवकोटाको प्रमुख आतिथ्यतामा सो कार्यक्रमको आयोजना गरिएको थियो । सो अवसरमा संयोजक देवकोटाले युवाहरुको भुमिका र जिम्मेवारी बारे प्रशिक्षण समेत दिएका थिए ।

यता इन्द्रावती गाउँपालिकामा पनि माओवादीले मतदाता रक्षा दल गठन गरेको छ । नेकपा (माओवादी केन्द्र)का केन्द्रिय सदस्य एवम् वाइसीएल इन्चार्ज रामप्रसाद सापकोटाको प्रमुख आतिथ्यतामा भएको कार्यक्रमबाट ३ सय ५० सदस्यीय रक्षा दल गठन गरिएको नेकपा (माओवादी केन्द्र) इन्द्रावतीले जनाएको छ ।

नेकपा (माओवादी केन्द्र) निकट युवा संगठन वाईसिएलले ‘एक बुथ, २५ युथ’ कार्ययोजना अनुसार मतदान केन्द्रमा खटिने भीफोर्स गठन गरिएको जिल्ला सचिव सुमित काफ्लेले जानकारी दिए । सिन्धुपाल्चोकमा यो पटक १ सय ४४ मतदान स्थल र ३ सय १६ मतदान केन्द्र रहेको छ ।