बहुप्राविधिक शिक्षालयलाई नसुधारे आन्दोलन गर्ने चेतावनी

चौतारा । सिन्धुपाल्चोकको चौतारामा रहेको दिनेश रामजी स्मृति बहुप्राविधिक शिक्षालयमा शैक्षिक गतिविधी सुधार गर्नुपर्ने लगायतका माग राखेर विद्यार्थीहरु आन्दोलित भएका छन् ।

बहुप्राविधिक शिक्षालय सबैको गौरवको विषय भएको भन्दै शिक्षालयमा भएको विकृति र आफूहरुको जायज माग पूरा गर्नुपर्ने भन्दै विद्यार्थीहरु आन्दोलित भएका हुन् । उनीहरुले शिक्षलयसँग अध्यापन नहुने विषयको अघिल्लो दिनमै पूर्व सूचना दिनुपर्ने, लाइब्रेरिमा सेमेस्टर अनुसार पुस्तकहरुको व्यवस्था गरिनुपर्ने, वर्कशपको पढाई नभएकोले पढाइ हुनुपर्ने, डिआईको जिम्मेवारी पूरा गर्नुपर्ने, खेलकुद सामग्रीको व्यवस्था गर्दै स्पोर्ट डे लागु गर्नुपर्ने माग राखेका छन् ।

त्यस्तै छात्राहरूको लागि निःशुल्क सेनेटरी प्याडको व्यवस्था हुनुपर्ने, नियमित तोकिएको समयसम्म कक्षा सञ्चालन गर्नुपर्ने, हाजिरी लागु गर्नुपर्ने, कम्प्युटर ल्याव व्यवस्थित गर्नुपर्ने, विषयगत शिक्षकको व्यवस्था गर्नुपर्ने र शिक्षालय प्रमुखले नियमित अनुगमन गर्नुपर्ने माग राखिएको अखिल (क्रान्तिकारी) दिनेश रामजी स्मृति बहुप्राविधिक शिक्षालय इकाई समितिका अध्यक्ष रुपक दुलालले बताए ।

शिक्षालयमा केही समस्याहरु देखिदै आएको र त्यसको कुनै समाधान नभएको भन्दै उनले उत्पन्न समस्याको समयमै निराकरण गर्न सकिएन भने गम्भीर रुप लिने विद्यार्थीको भविष्य र शिक्षालय सञ्चालनमा समेत प्रश्न उठ्न सक्ने भएकाले आफूहरुले शिक्षालयको ध्यानाकर्षण गरेको बताए ।

विद्यार्थीहरुले आईतबार शिक्षालय प्रमुख रामचन्द्र दाहाललाई लिखित रुपमा माग पेश गर्दा लिन नखोजेपछि सोमबार शिक्षालयको सूचनापाटीमा माग टाँस गरी आन्दोदनको चेतावनी समेत दिएका छन् । ‘विद्यार्थीका अत्यावश्यक विषयहरुमा हाम्रो संगठन अखिल (क्रान्तिकारी) इकाई समितिले ध्यानाकर्षण पत्र बुझाउन जाँदा प्रमुख रामचन्द्र दाहालले पत्र समेत नलिई विद्यार्थीले उठाएका विषय छलफल गर्ने वातावरण बन्न सकेको छैन’, अध्यक्ष दुलालले भने– ‘शिक्षालय प्रमुखले विद्यार्थीहरुको गुनासो सुन्ने, बुझ्ने, छलफल गर्न समेत सकारात्मक नहुनु आफैंमा गैरजिम्मेवारी पन हो ।’

उनले विद्यार्थीका आधारभूत विषयसमेटी राखिएको मागको सम्बोधन नभएमा चरणबद्व आल्दोलन गर्ने चेतावनी समेत दिए । शिक्षालय प्रमुख दाहालको गैरजिम्मेवारी कार्यबाट आउने सक्ने परिणामको स्वतः शिक्षालय र शिक्षालय प्रमुख जिम्मेवारी हुने समेत दुलालले बताए ।