सिन्धुपाल्चोकका १ हजार ८ सय ७८ उम्मेदवारले बुझाएनन् खर्च विवरण (सूचीसहित)

चौतारा । गत ३० वैशाखमा सम्पन्न स्थानीय तहको निर्वाचनमा उम्मेदवार भएका सिन्धुपाल्चोकका १ हजार ८ सय ७८ उम्मेदवारले खर्च विवरण बुझाएका छैनन् ।

निर्वाचन आयोगका अनुसार सिन्धुपाल्चोकमा २५ राजनीतिक दलबाट विभिन्न पदमा उम्मेदवारी दिएका २ हजार १ सय ३१ जना मध्ये १ सय ६७ जनाले मात्रै चुनावी खर्च विवरण बुझाएका छन् । ८६ जनाले विलम्ब गरी विवरण बुझाए । स्थानीय तह सदस्य निर्वाचन, २०७९ मा निर्वाचनमा भएको सम्पूर्ण खर्चको विवरण तोकिए बमोजिमको ढाँचामा निर्वाचन परिणाम घोषणा भएको तीस दिनभित्र सम्बन्धित जिल्ला वा प्रदेश निर्वाचन कार्यालयमा बुझाउनु पर्ने उल्लेख छ ।

१२ स्थानीय तह मध्ये ३ वटा स्थानीय तहका कुनै पनि उम्मेदवारले चुनावी खर्च विवरण बुझाएका छैनन् भने ९ वटा स्थानीय तहका केहि केहिले मात्रै विवरण पेश गरेको निर्वाचन आयोगले जनाएको छ । चौतारा साँगाचोकगढी नगरपालिकामा विभिन्न पदमा उम्मेदवारी दिएका ३ सय ४ जनामध्ये २ सय १३ जनाले चुनावी खर्च विवरण बुझाएका छैनन् । ७५ जनाले मात्रै बुझाएका छन् । १६ जनाले विलम्ब गरी विवरण बुझाएको आयोगको तथ्याङ्कमा छ । चुनाव जितेर हाल जनप्रतिनिधि रहेकाहरुमध्ये पनि अधिकांशले विवरण बुझाएको तथ्याङ्कमा देखिदैन ।

बाह्रविसे नगरपालिकामा विभिन्न पदमा १ सय ८२ जनाले उम्मेद्वारी दिएका थिए । उम्मेदवारी दिएको मध्ये ८ जनाले मात्रै चुनावी खर्च विवरण बुझाएका छन् । चुनाव जितेर मेयर भएका बालकृष्ण बस्नेत, उपमेयर मञ्जु तामाङसहित १ सय ७५ जनाले विवरण नै बुझाएका छैनन् । मेलम्ची नगरपालिकामा विभिन्न पदको लागि उम्मेदवारी दिएका २ सय ४३ उम्मेद्वार कसैले पनि विवरण बुझाएका छैनन् । त्यस्तै इन्द्रावती गाउँपालिकाको कुल २ सय ५३ र त्रिपूरा सुन्दरी गाउँपालिकाको कुल १ सय ३२ उम्मेदवारले पनि चुनावी खर्च विवरण बुझाएका छैनन् ।

जुगल गाउँपालिकामा उम्मेद्वारी दिएका १ सय ३४ जनामध्ये १ सय २८ जनाले खर्च विवरण बुझाएका छैनन् । अध्यक्ष जितेका रेशम स्याङ्बोसहित ८ उम्मेदवारले मात्रै अर्च विवरण बुझाएको आयोगले जनाएको छ । पाँचपोखरी गाउँपालिकामा उम्मेदवारी दिएका कुल १ सय ३६ मध्ये कुनैले पनि आयोगले जारी गरेको समयसीमामा भित्र खर्च विवरण बुझाएनन् । ४६ जनाले विलम्व गरी विवरण पेश गरे ।

त्यस्तै बलेफी गाउँपालिकामा विभिन्न राजनीतिक दलबाट उम्मेदवारी दिएका १ सय ७१ मध्ये ३८ जनाले विवरण पेश गरे भने १० जनाले विलम्व गरी विवरण बुझाए । भोटेकोशी गाउँपालिकामा उम्मेद्वारी दिएका १ सय ४३ जना मध्ये १ जनाले मात्रै विवरण पेश गरेको देखिन्छ । राप्रपाबाट अध्यक्ष पदमा उम्मेदवारी दिएका मिङ्मा शेर्पावाहेक अरुले विवरण बुझाएनन् ।

हेलम्बु गाउँपालिकामा उम्मेदवारी दिएका कुल १ सय २१ मध्ये ९७ जनाले चुनावी खर्च विवरण बुझाएका छैनन् । १० जनाले मात्रै विवरण पेश गरेको र १४ जनाले विलम्ब गरी खर्च बुझाएका छन् । त्यस्तै सुनकोशी गाउँपालिकामा निर्वाचनमा भाग लिएका १ सय ३६ मध्ये ३ जनाले मात्रै विवरण पेश गरे भने १ सय ३३ ले विवरण नै बुझाएनन् ।

आयोगले प्रेस विज्ञप्ति जारी गरी खर्च विवरण नबुझाउने उम्मेदवारको कारबाही प्रक्रिया प्रारम्भ गरेको जानाएको छ । आयोगका प्रवक्ता शालिग्राम शर्मा पौडेलद्वारा जारी विज्ञप्तीमा ‘ती उम्मेदवारहरुलाई तोकिएको समयावधिभित्र के कुन कारणले निर्वाचन खर्चको विवरण नबुझाएको हो ? तोकिएको समयावधिभित्र निर्वाचन खर्चको विवरण नबुझाएकोमा तपाईँहरुलाई निर्वाचन आयोग ऐन, २०७३ को दफा २६ बमोजिम किन कारबाही हुनु नपर्ने हो ?’ भनि सोधिएको छ । सोधिएका प्रश्नहरुको जवाफसहित आफ्नो स्पष्टीकरण सात दिनभित्र सम्बन्धित जिल्लाको जिल्ला निर्वाचन कार्यालयमा पेश गर्न आयोगले आदेश दिइएको छ ।

को–को उम्मेद्वारले बुझाएनन् खर्च विवरण ? हेर्नुस् सूचीः