संक्रमण बढ्दै गएपछि पुनः जनचेतना जगाउँदै प्रहरी

चौतारा । कोरोना भाईरस पुनः बढ्दै जान थालेपछि सिन्धुपाल्चोकमा जनचेतना फैलाउन सुरु गरिएको छ ।

कोभिड– १९ को दोस्रो लहरको प्रकोप छिमेकी मुलुक भारतमा थप फैलिएको र मृत्यु दरमा समेत वृद्धि भएको भन्दै नेपालमा पनि सोको जोखिम बढ्ने सम्भावनालाई मध्यनजर गरी जनचेतना जगाउन थालिएको हो । जिल्ला प्रहरी कार्यालय सिन्धुपाल्चोकको अगुवाईमा सिन्धुपाल्चोक उद्योग वाणिज्य संघसँग समन्वय गरी कोभिड– १९ सम्बन्धी सचेतनामूलक माईकिङ गरिएको छ ।

माईकिङको क्रममा सिन्धुवासीलाई सार्वजनिक स्थलमा जाँदा अनिवार्य मास्कको प्रयोग गर्न, भौतिक दूरी कायम गर्न, अनावश्यक भीडभाड नगर्न, सेनिटाइजरको प्रयोग गर्न, समय समयमा साबुन पानीले हात धुन, भौतिक दुरी कायम गरी आफ्नो दैनिक कार्य सञ्चालन गर्न, विद्यालय सञ्चालन भएको अवस्थामा विद्यार्थीहरुलाई अनिवार्य मास्क लगाउने व्यवस्था गर्न, कक्षा कोठाको व्यवस्थापन सोही अनुसार गरी सेनिटाइजर प्रयोग गर्न, जात्रा, पर्व, संस्कृतिहरूमा हुने भेला जमघट नगर्न आग्रह गरिएको छ ।

चैत १५ र १६ गते हुने होली पर्वलाई घरमै मनाउन र संक्रमणको दरलाई न्यूनिकरण गर्नको निम्ति स्वास्थ्यका मापदण्डहरु अनिवार्य रुपमा पालना गर्न अनुरोध गर्दै चौतारा बजार तथा अन्य भित्री गाँउहरुमा माईकिङ गर्दै जनचेतना फैलाएको जिल्ला प्रहरी कार्यालय सिन्धुपाल्चोकका प्रहरी नायव निरीक्षक घनश्याम नेपालले बताए ।