अक्सिजन प्लान्ट स्थापना गर्दै सुनकोशी गाउँपालिका

खाडीचौर । सिन्धुपाल्चोकको सुनकोशी गाउँपालिका आफैलें अक्सिजन प्लान्ट स्थापना गर्ने भएको छ । कोरोना संक्रमितलाई अक्सिजन अभाव हुन नदिने उद्देश्यले पालिकाले अक्सिजन प्लान्ट स्थापना गर्न लागेको जनाएको छ ।

सुनकोशी गाउँपालिकाको कार्यपालिकाको बैठकले अक्सिजन प्लान्ट स्थापना गर्ने औपचारिक निर्णय गर्दै प्रक्रियासमेत अघि बढाएको गाउँपालिका अध्यक्ष श्रवणकुमार जिसी (विनोद) ले जानकारी दिए । सम्भवतः देशभरका स्थानीय सरकार मध्ये सुनकोशी गाउँपालिकाले यसरी आफ्नै पहलमा अक्सिजन प्लान्ट स्थापना गर्न लागेको यो पहिलो भएको गाउँपालिका अध्यक्ष जिसीले जानकारी दिए । अक्सिजनमा सिन्धुपाल्चोकलाई आत्मनिर्भर बनाउने उद्देश्य रहेको उनले बताए ।

सिन्धुपाल्चोकमा अक्सिजन प्लान्ट नहुँदा छिमेकी जिल्लाहरूमा गएर अक्सिजन प्लान्ट भर्दा निकै समस्या भएपछि गाउँपालिकाले विभिन्न सहयोगी संघ संस्थासँगको समन्वयमा अक्सिजन प्लान्ट स्थापना गर्न लागेको हो । गाउँपालिकाले वडा नम्बर- ६ को थुम्पाखरमा अक्सिजन प्लान्ट स्थापना गर्न लागेको अध्यक्ष जिसीले जानकारी दिए । गाउँपालिकाले एनसिसी बैंक, सिन्धुपाल्चोक उद्योग वाणिज्य संघ, क्षमादेवी व्यावसायिक समूह लगायत अन्य सहयोगी व्यक्ति र संघ संस्थासँग पनि अक्सिजन प्लान्टको लागि सहकार्य गर्न लागेको छ ।

नेपाली कांग्रेसका केन्द्रीय सदस्य एवम पूर्व सूचना तथा सञ्चार मन्त्री मोहनबहादुर बस्नेतले अक्सिजन प्लान्ट निर्माणका लागि बैंक लगायत अन्य संघ संस्थाहरूसँग समन्वय गरिदिएको गाउँपालिका अध्यक्ष जिसीले जानकारी दिए । एनसिसी बैंक सञ्चालक समितिमा बस्नेत पनि सदस्य छन् । अहिलेको यो महामारीमा जुध्न र भविष्यमा हुने संकटमा समेत अक्सिजन प्लान्ट स्थापना भएपछि एउटा पूर्वाधारको रुपमा यसले जिल्लाबासी र छिमेकी जिल्लाहरुलाई समेत सहयोग पुग्ने अध्यक्ष जिसीले बताए ।

सुनकोशी गाउँपालिकाको समन्वयमा स्थापना हुने अक्सिजन प्लान्टबाट गाउँपालिकाको स्वास्थ्य संस्थामा मात्रै नभएर जिल्लाभर वितरण हुने र अन्य जिल्लामा समेत अक्सिजन प्रदान गर्न सक्ने गरेर अक्सिजन प्लान्टको लागि बजेटको स्रोत सुनिश्चित गरिएको गाउँपालिकाले जानकारी दिएको छ ।