हेलम्बुमा भीषण पहिरो, मेलम्ची क्षेत्र उच्च जोखिममा

मेलम्ची । मेलम्ची खानेपानी आयोजनाको मुहान क्षेत्र हेलम्बु हुँदै आएको बाढीले हेलम्बु गाँउपालिकाको तिम्बु र चनौटे बजारमा वितण्डा मच्चाएको छ।

अविरल वर्षाका कारण आएको बाढीले ग्याल्थुममा रहेको ट्राउट फर्म, रिसोर्ट बगाएको प्रहरीले जनाएको हो। बाढीबाट ५ जना भन्दा धेरै व्यक्ति बेपत्ता भएको हुन सक्ने आँकलनसमेत रहेको जिल्ला प्रहरी कार्यालयले जनाएको छ । हेलम्बुदेखि मेलम्ची मुनीसम्म भागाभाग रहेको जिल्ला प्रहरी कार्यालय सिन्धुपाल्चोकका डिएसपी प्रकाश सापकोटाले जानकारी दिए । हेलम्बुमा रहेको प्रहरी कार्यालय भवनसम्म बाढी पसेको छ । सडकहरू बगाएको स्थानीयले जानकारी दिए ।

मेलम्ची आयोजनाको काम गर्नेहरू बस्ने चाईनिज क्याम्पमा समेत बाढी पसेको छ । अम्बाथानको सशस्त्र क्याम्प पनि जोखिममा रहेको डिएसपी सापकोटाले जानकारी दिए । तिम्बुदेखि तलतिरको नदिकिनारमा रहेका धेरै घरहरू बगाएको स्थानीय अर्जुन भण्डारीले बताए । अझैसम्म निरन्तर वर्षा भईरहेकोले उद्दार तथा खोजीमा समेत समस्या भईरहेको छ ।

बाढीको कारण मेलम्ची नगरपालिकाको मेलम्ची बजार समेत उच्च जोखिममा रहेको छ । मेलम्चीको आमा ह्याल्मो बसपार्कमा रहेको सबैजसो घर टहरा बगाएको र रेडियो मेलम्चीको भवन समेत जोखिममा रहेको रेडियो मेलम्चीका स्टेसन म्यानेजर देवराज सुवेदीले बताए ।

मंगलबार साँझबाट मेलम्ची बजारका हजारौं स्थानीय ईन्द्रेश्वरी माध्यामिक विद्यालय, नगरपालिकाको कार्यालय, टार तथा माथिल्लो भेगका जङ्गलमा गएर बसेका छन् । मेलम्ची खानेपानी आयोजनाको मुहानक्षेत्र भन्दा माथि ठूलो पहिरो गएको छ । हेलम्बु प्रहरी चौकीको भवन समेत जोखिममा परेकाले प्रहरी समेत सुरक्षीत ठाउँको खोजिमा भवन छाडेर भागेका छन् । बाढीले नदी किनारका सबैजसो माछा पोखरी बगाएको छ ।

नदी तटीय भेगका नागरिकलाई सुरक्षित ठाउमा जान प्रशासनले अनुरोध गरेको छ । विस्तृत विवरण आउन बाँकी रहेको छ ।