युवा व्यवसायी र किसानलाई अनुदान

नवलपुर । इन्द्रावती गाउँपालिकाको आ.व. २०७८/०७९ को नीति तथा कार्यक्रम र बजेट सार्वजनिक गरिएको छ ।

शुक्रबार आयोजित नवौ गाउँसभामा गाउँपालिका अध्यक्ष बंशलाल तामाङले कृषि, पर्यटन, स्वास्थ्य र पूर्वाधार विकासलाई प्राथमिकतामा राखी नीति तथा कार्यक्रम र ८० करोड ६२ लाख ५४ हजारको आगामी आ.व. को बजेट प्रस्तुत गरेका छन् । कृषि क्षेत्रलाई प्राथमिकतामा राखेको निति तथा कार्यक्रमले गाउँपालिका भरिका दुग्ध उत्पादक किसानले बिक्री गर्ने दुधमा कृषकलाई प्रति लिटर दुई रुपैयाँको दरले अनुदान दिने व्यवस्था गरेको छ ।

कार्यक्रमले एक वडा एक कृषि तथा फलफूल पकेट क्षेत्र, एक टोल एक सहकारी, घरघरमा रोजगारी, एक वडा एक खेलमैदान, छोराछोरी विद्यालयमा बाबुआमा व्यवसायमा, एक घर एक स्वच्छ खानेपानीको धारा र बारै वडामा बारै महिना सार्वजनिक यातायात, व्यवसायीक कृषि पेशामा लाग्न चाहने युवालाई पाँच लाख सम्मको योजनामा पचास प्रतिशत अनुदान जस्ता महत्वाकांक्षी योजना प्रस्तुत गरेको छ ।

दिगो बिकास र सुशासनको लहर, इन्द्रावती गाउँपालिका बासीको रहर भन्ने आफ्नो मुल नाराको समिक्षा गर्दै यस वर्ष देखि इन्द्रावती समृद्धिको आधार शिक्षा, कृषि, स्वास्थ्य, पर्यटन र पूर्वाधार भन्ने नारा तय गरेको छ । बजेटले गाउँपालिकाको प्रशासकीय भवन, ऐसेलुखर्क रंगशाला, जिरोकिलो नवलपुर पक्की सडक लगायतका पालिकाको गौरबका योजनाहरुलाई आगामी आर्थिक वर्ष भित्रमा सम्पन्न गरिसक्ने लक्ष्य राखेको छ ।

गाउँपालिका अध्यक्ष वंशलाल तामाङको प्रमुख आतिथ्यतामा सम्पन्न गाउँसभामा उपाध्यक्ष मिरा लामा अधिकारीले स्वागत मन्तव्य, प्रमुख प्रशासकीय अधिकृत श्रीकृष्ण पौडेलले गत आ.व. को प्रगति प्रतिवेदन प्रस्तुत गरेका थिए भने सहजीकरण शिक्षा शाखाका कविराज पौडेलले गरेका थिए ।