टीम नेपालद्वारा तेर्से माविलाई २० लाख सहयोग

मेलम्ची । असार १ गते मेलम्ची नदीमा आएको भीषण बाढीको कारण भौतिक क्षति सहित जोखिमयुक्त रहेको तेर्से माद्यामिक विद्यालयको संरक्षण र वैकल्पिक कक्षाकोठा व्यवस्थापनका निम्ति टीम नेपालले नगद २० लाख सहयोग गरेको छ ।

१८ वर्षदेखि विद्यालयसँग सहकार्य निरन्तर गर्दै आएको टीम नेपालले विद्यालयलाई बुधबार सो रकम हस्तान्तरण गरिएको टीम नेपालका व्यवस्थापक तथा विद्यालय व्यवस्थापन समितिका अध्यक्ष निलबहादुर शाहीले बताए । विद्यालयका हरेक अप्ठेरा परिस्थितिहरुमा टीम नेपालको सहयोग विशेष हुने गरेको विद्यालयका प्रधानाध्यापक कृष्ण ढुंगानाले बताए ।

भूकम्प पछि पनि भौगोलिक हिसाबले जोखिमयुक्त तरिकाले आउने विद्यार्थीका लागि अस्थायी छात्राबासको व्यवस्थापन, विभिन्न समयमा नीजिस्रोत शिक्षकको तलब भत्ता व्यवस्थापन, विद्यालयको तह अपग्रेड गर्दै जानेक्रममा आवश्यक आर्थिक व्यवस्थापन, विभिन्न विदेशी सहयोगी महानुभावहरुसँग विद्यालयको सम्बन्ध स्थापित, समुदायमा शिक्षा, स्वास्थ्य र बालबालिका लक्षित थुप्रै गतिबिधि, संस्थाको नेतृत्वमा बालगृहको व्यवस्थापन सहित विद्यालयसँगको विभिन्न शैक्षिक सहकायर्मा टीम नेपालको भूमिका उदाहरणीय रहेको पनि प्रधानाध्यापक ढुंगानाले जानकारी दिए ।

विपत्तिको समयमा संस्थाको यो महत्वपूर्ण सहयोगको उच्च सम्मान गर्दै सहयोगलाई विद्यालयको हितका लागि उचित तरिकाले परिचालन गर्ने प्रतिवद्धता सहित संस्थाप्रति विद्यालय परिवारले धन्यवाद व्यक्त गरेको छ । साथै संयोजनको लागि निलबहादुर शाहीप्रति प्रधानाध्यापक ढुंगानाले धन्यवाद व्यक्त गरे ।

विद्यालय संरक्षण र वैकल्पिक कक्षाकोठा व्यवस्थापनका निम्ति विभिन्न व्यक्ति, विद्यार्थी, विद्यालयका शिक्षक, शिक्षिका, पूर्व विद्यार्थी, समुदाय, विभिन्न राजनितीक पार्टी तथा संघ संस्थाहरुबाट भौतिक तथा आर्थिक सहयोग प्राप्त भईरहेको प्रअ ढुंगानाले जानकारी दिए ।