नृत्य निर्देशक संघ काठमाडौँको अध्यक्षमा बुद्ध

काठमाडौँ । लामो समयदेखि नृत्य निर्देशनमा संलग्न बुद्ध लामा नृत्य निर्देशक संघ नेपाल काठमाडौँ शाखाको अध्यक्षमा निर्वाचित भएका छन् ।

यस अघि पनि अध्यक्ष रहेका लामा पुनः निर्वाचित भएका हुन् । शनिबार संघको चौथो साधारण सभा तथा दोस्रो अधिवेशनबाट लामाको नेतृत्वमा १३ सदस्यीय नयाँ कार्यसमिति निर्विरोध निर्वाचित भएको हो । संघको नयाँ कार्य समितिको दुई जना उपाध्यक्षमा अर्जुन तामाङ र महेश थापा, सचिवमा देवराज गुरुङ, सह सचिवमा छिरिङ लामा, कोषाध्यक्षमा ममता राई र सह–कोषाध्यक्षमा निरु फुँयाल निर्विरोध निर्वाचित भएका छन् ।

त्यस्तै सदस्यमा अनिल भुजेल, पूर्णबहादुर स्याङ्तान, लक्ष्मी पुरी, सरस्वती पोखरेल, समृद्धि पन्त र भक्त कुमार राई निर्वाचित भएका छन् । अघिल्लो कार्यकालमा पनि लामाको नृत्वमानै कार्यसमिति गठन भएको थियो । सभालाई सम्बोधन गर्दै नेपाली काँग्रेस बिपीका नुवाकोट जिल्ला सभापति एवं केन्द्रीय सदस्य श्यामबहादुर गुरुङले पछिल्लो समय नेपाली कला संस्कृति अतिक्रमणमा परेको बताए । संस्कृति पुर्खाले संरक्षण गरेर गएको भए पनि अहिले दोधारमा रहेको भन्दै उनले कलाकारलाई राज्यले सम्मान गर्नुपर्नेमा जोड दिए ।

सो समारोहमा नृत्य निर्देशक संघ नेपालका केन्द्रीय अध्यक्ष भुवनदास श्रेष्ठले नृत्य निर्देशकको सिपी कोरोनाका कारण १८ महिना प्रयोगमा नआउँदा समस्या भएको बताए । कार्यक्रममा जिल्ला शाखा काठमाडौँका सल्लाकार कमल राईले गाउँघरमा विना निर्देशन राम्रो नाच्न सक्नेहरू रहेको भन्दै घरघरमा नृत्य गर्न सक्ने क्षमता भएका व्यक्तिहरू रहेको जनाए । सबैले कला संस्कृतिको सम्मान गर्नुपर्ने र कोरोनाले समस्या भयो भनेर बस्नु भन्दा पनि कोरोनाको डटेर सामना गर्नुपर्ने उनलेको तर्क थियो ।

कार्यक्रममा नृत्य निर्देशक संघ भक्तपुर शाखाका अध्यक्ष चूडामणि फुँयाल, ललितपुर शाखाका सचिव मिर्नरवा शर्मा राजोपाध्याय तथा पत्रकार महासंघ उपत्यका समितिका सदस्य अर्जुनबहादुर तामाङ लगायतले शुभकामना मन्तव्य व्यक्त गरेका थिए ।