२६ लाख रुपैंया बराबरको स्वास्थ्य सामग्री प्रदान

चौतारा । सिन्धुपाल्चोकको चौतारा अस्पताल र जलविरे प्राथमिक स्वास्थ्य केन्द्रमा एशिया नेपालले कोभिड– १९ प्रतिकार्यको लागि स्वास्थ्य सामग्री तथा उपकरणहरु हस्तान्तरण गरेको छ ।

२६ लाख रुपैंया बराबरको स्वास्थ्य सामग्री हस्तान्तरण गरिएको एशिया नेपालका कार्यक्रम निर्देशक नवराज आचार्यले बताए । अक्सिजन कन्सन्ट्रेटर, सि क्याप डिभाइस, हस्पिटल माक्र्स, अक्सिमिटर, एन्टिजिन किट लगायत २४ प्रकारको कोभिड प्रतिकार्य सामग्री प्रदान गरिएको उनले जनाए ।

संस्थाले चौतारा अस्पताल व्यवस्थापन समितिका अध्यक्ष ईश्वरीप्रसाद श्रेष्ठ र मेडिकल सुपरिटेन्डेन्ट डा. करुणा बज्राचार्यलाई संयुक्त रुपमा सामग्री हस्तान्तरण गरेको थियो । प्राप्त सहयोग सामग्री बुझ्दै चौतारा अस्पताल व्यवस्थापन समितिका अध्यक्ष श्रेष्ठले अस्पतालबाट दिने सेवामा यस्ता सामग्रीहरुले महत्वपूर्ण सहयोग गर्ने बताए । अध्यक्ष श्रेष्ठले सामग्री सहयोगका लागि एशिया नेपाललाई धन्यवाद व्यक्त गर्दै बिरामीहरुको सुलभ उपचारमा चौतारा अस्पताल सदैव लागिरहेको बताए । उनले सामग्री उपलब्ध गराउनको लागि महत्वपूर्ण भूमिका निर्वाह गरेको प्रति गैरसरकारी संस्था महासंघका केन्द्रीय सदस्य राजेन्द्र शर्मालाई धन्यवाद समेत प्रदान गरे । आगामी दिनहरुमा पनि यस्ता सहयोगहरुले विरामीको सहज उपचारमा सहयोग पुग्ने अध्यक्ष श्रेष्ठको भनाई थियो ।

सो कार्यक्रममा अस्पतालका मेडिकल सुपरिटेन्डेन्ट डा. करुणा बज्राचार्यले यस्ता सामग्रीहरु कोभिड– १९ र श्वासप्रश्वासका बिरामीहरुको लागि निक्कै उपयोगी हुने बताईन् ।

त्यस्तै जलविरे प्राथमिक स्वास्थ्य केन्द्रका प्रमुख डा.प्रशान्त ज्ञवालीले स्वास्थ्य केन्द्रमा रहेको एउटा अक्सिजन कन्सन्ट्रेटर बिग्रिएको अवस्थामा प्राप्त भएको सामग्रीहरुले उपचार सेवामा सहजता ल्याउने बताए । ‘अहिले प्राप्त भएको कोभिड प्रतिकार्य सामग्रीले विकट क्षेत्रबाट आएका विरामीहरुलाई थप सहज बनाउनेछ’, उनले भने– ‘यसले हाम्रो स्वास्थ्य केन्द्रबाट थप स्वास्थ्य सेवा दिन पनि सहयोग पुग्ने आशा राखेका छौं ।’

एशिया नेपालका परियोजना प्रबन्धक सुनिल खनालले सिन्धुपाल्चोकमा कोभिड प्रतिकार्यमा सहयोग गर्न पाउँदा खुशी व्यक्त गर्दै सामग्रीहरुको सहि सदुपयोग गर्न आग्रह समेत गरे । सामग्री हस्तान्तरण कार्यक्रमको समन्वय गैरसरकारी संस्था महासंघका केन्द्रीय सदस्य राजेन्द्र शर्माले गरेका थिए ।