संग्रौलाको कथा संग्रह ‘मैतुङ्गे’ सार्वजनिक

काठमाडौं । दिनेशकुमार संग्रौलाको दोस्रो कृति कथा संग्रह मैतुङ्गे सार्वजनिक भएको छ । काठमाडौंको हार्दिक होटलमा एक समारोहकाबीच शनिबार अनेशासका पूर्व अध्यक्ष राधेश्याम लेकालीको प्रमुख आतिथ्यमा कार्यक्रम समापन भएको हो ।

उक्त कथा संग्रहमाथि समीक्षा राख्दै पत्रकार लेखक दामोदर न्यौपानेले हिजोआज पठन संस्कृति निकै कम भएको जनाउँदै त्यसैका बीच लेखकले पुस्तक लिएर आउनु निकै चुनौतीपूर्ण रहेको बताए ।

त्यस्तै, अर्का समीक्षक कथाकार लेखक मञ्जिला अनिलले कथा माथि समीक्षा राख्दै पछिल्लो समय कथाको माग निकै बढेको बताए । ‘हाँलाई हामी सक्रिय स्रष्टाको रूपमा चिन्न बुझ्न सक्छौँ । कथामा सामाजिक घटनाले परिवेश बोकको छ’, उनले भने । मैतुङबाट आएकाले मैतुङ्गे पुस्तकको नाम राखिएको अनुमान लगाउन सकिने समीक्षकले बताए । ‘कथाका घटनाहरू स्वभाविक रूपमा अघि बढेका छन् । लेखकले पुस्तक मार्फत सामाजिक रूपान्तर खोज्नुभएको छ । आफ्नै वरिपरि घुमिरहेका घटनाहरूको परिवेशमा लेखिएको हो मैतुङ्गे । सकारात्मक रूपमा कथाको परिवेश टुंगाइएको छ’, समीक्षक मञ्जिलाले बताए ।

आफ्नै गाउँ ठाउँको कथा आफुले देखेको, भोगेर र सुनेको कथालाई पुस्तकमा उतारेको लेखक सङ्गौलाले बताए । लेखक सङ्गौला नेपाल टेलिभिजनका पूर्व निर्देशक पनि हुन । उक्त पुस्तक विएन पुस्तक संसारले बजारमा ल्याएको हो । पुस्तकको मूल्य २२५ रहेको विएन संसारका सञ्चालक सूर्य बिसीले बताए ।