इन्द्रावती कप फुटबल प्रतियोगिता सुरु

भिमटार । ‘स्वास्थ्यका लागि खेलकूद, राष्ट्रका लागि खेलकूद’ भन्ने मूल नाराका साथ चौतारा साँगाचोकगढी नगरपालिका वडा नम्बर ११ भिमटारमा आईतबारदेखि इन्द्रावती कप फुटबल प्रतियोगिता सुरु भएको छ ।

चौतारा साँगाचोकगढी नगरपालिकाका मेयर अमानसिं तामाङले सो कार्यक्रमको उद्घाटन गरेका हुन् । नगर खेलकूद विकास समितिको सहयोग र भिमेश्वर समाजसेवा युवा क्लबको आयोजनामा हुन लागेको उक्त प्रतियोगिता आज कार्तिक १४ गतेदेखि आगामी कात्तिक १९ गतेसम्म ६ दिन चल्ने भएको छ ।

चौतारा साँगाचोकगढी नगरपालिका वडा नम्बर ११ भिमटारमा हुन लागेको प्रतियोगितामा सिन्धुपाल्चोक र काभ्रेपलान्चोक जिल्लाका कूल २० टोलीको सहभागिता रहेको क्लबका सचिव श्रीकृष्ण माझीले जानकारी दिए । ‘यो प्रतियोगिताले जिल्लामा खेलकूद विकासका लागि स्थानीय तथा जिल्लास्तरमा युवाको प्रतिभा उजागर गर्न सहयोग पुर्याउनेछ’, सचिव माझीले भने, ‘हामीले यस प्रतियोगितालाई भव्यताका साथ अघि बढाउन खुलारुपमा इच्छुक व्यक्तिको निवेदन आह्वान गरेका थियौँ ।’

सो प्रतियोगितामा प्रथम हुने विजेतालाई ५० हजार, द्वितीय हुने उपविजेतालाई २५ हजार र सान्त्वना पाउने टोलीलाई १२ हजार पाँच सय सहित शिल्ड, पदक, प्रमाणपत्र र कदरपत्र दिइने कार्यक्रमका संयोजक नेत्रबिक्रम माझीले जानकारी दिए । ‘हामीले ठूलो धनराशिको पुरस्कार राखेर प्रथमपटक यो प्रतियोगिता आयोजना गर्न लागेका हौं’, नेत्रले भने, ‘स्थानीय खेलाडीको प्रतिभालाई प्रदर्शन गर्न प्रतियोगिता आयोजना गरेका छौँ ।’ प्रतियागितामा पहिलो दिन ४ वटा खेल भएका छन् ।