दुर्लभ वन्यजन्तु रेडपाण्डाको छालासहित पक्राउ

काठमाण्डौ । दुर्लभ वन्यजन्तु रेडपाण्डाको सिंगो शरीर समेतको ४ थान छालासहित ४ जनालाई काठमाडौं बसुन्धारास्थित द मयूर क्याफेबाट प्रहरीले पक्राउ गरेको छ ।

सिन्धुपाल्चोकको चौतारा साँगाचोकगढी नगरपालिका– १३ घर भई काठमाडौं कलंकी बस्ने २५ वर्षीय सुरेश गिरी, काठमाडौं टोखा बस्ने नुवाकोट शिवपुरी गाउँपालिका– ४ घर भएका ३१ वर्षीय कृष्ण बहादुर तामाङ, काठमाडौं गोंगबु बस्ने धादिङ गंगाजमुना गाउँपालिका–७ घर भएका ३९ वर्षीय निरबहादुर घले र काठमाडौं स्वयम्भू बस्ने ओखलढुंगा मानेभञ्ज्याङ गाउँपालिका– २ घर भएका २९ वर्षीय मोहनकर्ण कार्की रहेका छन् ।

बसुन्धारा क्षेत्रमा केही व्यक्तिहरुले दुर्लभ वन्यजन्तु रेडपाण्डाको छालाको कारोबार गरिरहेको भन्ने सूचनाको आधारमा महानगरीय अपराध महाशाखा मिनभवनबाट खटिएको प्रहरीले उक्त क्याफेबाट उनीहरूलाई उक्त छाला ३० लाख रुपैयाँमा मोलमोलाई गरिरहेको अवस्थामा फेला पारी पक्राउ गरेको हो ।

उनीहरूलाई बरामद छालासहित आवश्यक कारबाहीका लागि डिभिजन वन कार्यालय हात्तीसार काठमाडौं पठाइएको उक्त महाशाखाले जनाएको छ ।