पर्यटन प्रबर्द्धन गर्न यार्मासिङमा होमस्टे सञ्चालन

तातोपानी । सिन्धुपाल्चोकको प्रमुख पर्यटकीयस्थल भैरवकुण्ड पदमार्गमा होमस्टेको सुरुआत गरिएको छ । भोटेकोशी गाउँपालिका– ३ स्थित यार्मासिङमा पर्यटन प्रबर्द्धनलक्षित होमस्टेको सुरुआत गरिएको हो ।

भैरवकुण्ड, दुगुनागढीलगायत पर्यटकीय स्थलमा घुम्न आउने पर्यटकको सुविधाका लागि स्थानीय आमा समूहले होमस्टे प्रबर्द्धन गरेका हुन् । यहाँ भूईंचालोअघि पनि यस्तो सेवा उपलब्ध थियो । भूईंचालोले घरहरु भत्काएपछि होमस्टे सेवा टुटेको हो । पर्यटकीय गाउँ छगाम, बगाम, लिस्तीमाई मन्दिरसमेत यही बाटो हुँदै जाने भएकाले फेरि होमस्टेको सुरुआत गरिएको आमा समूहकी अध्यक्ष पासाङबुटी शेपाले बताइन् ।

हाल प्रबर्द्धन गरिएको होमस्टे ऐतिहासिक दुगुनागढी नजिकै पर्दछ । भूईंचालोपछि दुगुनागढीको पुनर्निर्माण सकिएकाले यहाँ आउने पर्यटकहरु बढेका छन् । यहाँ गौरीशंकर संरक्षण क्षेत्रलेसमेत होमस्टे सञ्चालनका लागि पहलकदमी लिएको थियो । यार्मासिङ गाउँमा करिब २० घरमा होमस्टे सञ्चालन गरिएको छ । हरेक घरमा दुई वटा कोठा पाहुनाका लागि छुट्टाइएको छ । यहाँ आउने पर्यटकका लागि होमस्टे सञ्चालकले अतिथि सत्कार, जलपान, खानपिनको व्यवस्था गर्ने गरेका छन् ।

पाहुनालाई स्थानीय शेर्पा संस्कृति झल्कने नाचगानसमेत देखाइने गरिएको छ । पुनः होमस्टे सञ्चालनमा ल्याएपछि दुगुनागढीलगायतका क्षेत्रमा आउन सहज भएको पेमाल्हामू शेर्पाले बताइन् । उनी पहिलोपटक दुगुनागढी क्षेत्रमा आएकी हुन्। सिन्धुपाल्चोककै फुल्पिङकट्टीबाट उनी साथीसंगीसँगै आएकी थिइन् ।

नजिकै पर्ने दुगुनागढी पर्यटकको प्रमुख गन्तब्यस्थल हो । देशभरका ऐतिहासिक १० गढीमध्येको भित्र यो गढीलाई मानिन्छ । अग्लो स्थानमा समथर भूभाग र रमणीय डाँडामा रहेका बिशाल चट्टानलाई कलात्मकता दिई पहराको खोचमा तत्कालीन प्रधानमन्त्री जंगबहादुरले तीब्बतसँग युद्ध लडेको किवंदन्ती छ । कडा चट्टानलाई आड लिएर नेपाली पक्षले यही गढीबाट तीब्वततिर प्रहार गरेको शिलालेखसमेत छ ।

करिब ४२ सय वर्गमिटरमा फैलिएको गढीमा सिडिएमए टावरदेखि विभिन्न हाउसवायर समेत जडान गरिएको छ । भोटेकोसी गाउ“पालिका ३ मा रहेको करिब एक सय ६० वर्ष परानो पुरातात्विक दुगुनागढी पुनर्निर्माण ध्वस्त भएको ५० महिनापछि पुनर्निर्माण थालिएको हो ।

वि.सं. १९१२ मा तीब्बत र नेपाल बीच भएको युद्धमा नेपाल पक्षले यही गढीलाई आधारक्षेत्र बनाएर लडाईं लडेका थिए । त्यसताका नेपाली पक्षको सुरक्षार्थ तत्कालीन प्रधानमन्त्री जंगबहादुर राणाले अग्लो स्थान रोजेर लडाईंका लागि सहज बनाउन गढीको निर्माण गरेका थिए । पछिल्लोसमय यहाँ आउने पर्यटकको संख्या बढेपनि दुगुनागढीसम्म पुग्न केही समस्याहरु अझै छन् । भिरालो भूबनोट भएकाले सडक स्तरोन्नति आवश्यक रहेको स्थानीयको भनाई छ ।

सडक सञ्जालले दुगुनागढी जोडिएपनि सडक जिर्ण छ । सडक मर्मत गर्नसके अझै पर्यटक बढ्ने विश्वास स्थानीयको छ ।