चोरीमा संलग्न २० वर्षे युवतीसहित चार पक्राउ

चौतारा । चोरीमा संलग्न रहेको आरोपमा २० वर्षिया युवतीसहिच चार जनालाई जिल्ला प्रहरी कार्यालय सिन्धुपाल्चोकले पक्राउ गरी सोमबार सार्वजनिक गरेको छ ।

पक्राउ पर्नेहरुमा सिन्धुपाल्चोकको सुनकोशी गाउँपालिकाकी– ६ की २० वर्षिया कञ्चन पराजुली, ईन्द्रावती गाउँपालिका– १० बडहरेका २० वर्षिय मनिष सुन्दास, इन्द्रावती गाउँपालिका– ९ का २५ वर्षिय बुद्ध तामाङ र सोहि ठाउँका २६ वर्षिय अनिल तामाङ छन् । उनीहरुले पुष १२ गते नेपाल पत्रकार महासंघ सिन्धुपाल्चोक शाखाका अध्यक्ष जीवन श्रेष्ठको घर फोडेर धनमाल चोरी गरेका थिए । सदरमुकाम चौतारास्थित पुरानो बजारमा रहेको घरमा कोही नभएको अवस्थामा ढोका तथा दराजको ताला फुटाइ दराजभित्र राखेका सुनचाँदीका गरगहना र नगद चोरी भएको थियो ।

उनीहरूले श्रेष्ठको घरबाट १ थान आधा तोलाको सुनको १० गेडि मंगलसुत्र, १ थान दुई तोलाको सुनको मंगलसुत्र, १ थान दुई तोलाको हारमाला, १ थान अढाई तोलाको सिक्री र लकेट, १ थान आधा तोलाको लकेट, १ थान सुनको दानालगायत सुनको चन्द्रमा, मुन्द्री, झुम्का, टप, औंठी, चुरासहित चाँदीका गरगहना चोरी गरी फरार भएका थिए । उनीहरूले एक लाख एक हजार रुपैयाँ नगदसमेत चोरी गरेको जाहेरी परेको प्रहरीले जनाएको छ ।

कञ्चनको निर्देशनमा अन्य युवाहरूले चोरी गरेको प्रारम्भिक अनुसन्धानले देखाएको प्रहरीले जनाएको छ । श्रेष्ठको घरमा कोठा लिएर बस्दै आएकी कञ्चनले युवाहरुलाई प्रयोग गरी चोरी गराएको हुनसक्ने प्रहरीले जनाएको छ । पक्राउ परेका मनिष राजधानीमा एकै कलेजमा कञ्चनसँग अध्ययन गर्दथे । उनीहरूलाई काठमाण्डौमा खटिएको अनुसन्धान अधिकृत प्रहरी निरीक्षक हरिवोल केसीको प्रहरी टोलीले पक्राउ गरेको हो ।

घरभाडामा बस्ने पराजुलीमाथि शंका लागेपछि चोरी भएकै दिनदेखि उनी प्रहरी नियन्त्रणमा थिइन् । उनीमाथि अनुसन्धान गरेपछि प्रहरी बाँकी तीन युवाहरू नजिक पुगेको थियो । जिल्ला प्रहरी कार्यालय सिन्धुपाल्चोकका प्रमुख एसपी राजन अधिकारीले चोरी भएकामध्ये अधिकांश सुन, चाँदीसमेत उनीहरूको साथबाट बरामद भएको जानकारी दिए । उनीहरुमाथी थप अनुसन्धान भईरहेको अधिकारीले बताए ।