माओवादीले मनायो २७औं जनयुद्ध दिवस, विद्यार्थीद्वारा दीप प्रज्वलन

चौतारा । नेकपा (माओेवादी केन्द्र) सिन्धुपाल्चोकले आईतबार जिल्लाका १२ वटै स्थानीय तहमा विविध कार्यक्रम गरी एकैसाथ २७औं जनयुद्ध दिवस मनाएको छ ।

सिन्धुपाल्चोकका १२ ओटै स्थानीय तहमा विविध कार्यक्रमका साथ २७औं जनयुद्ध दिवस मनाईएको नेकपा (माओवादी केन्द्र) सिन्धुपाल्चोक समन्वय समितिका संयोजक गोविन्द पराजुलीले जानकारी दिए । २७औं जनयुद्ध दिवसको सन्दर्भमा पार्टीका सम्पूर्ण नेता तथा कार्यकर्ता, शुभेच्छुक, शुभचिन्तक एवम् जनसमुदायलाई एकतावद्ध भएर सबै खाले प्रतिक्रियावादी षडयन्त्रलाई परास्त गर्न एक हुनुपर्ने पराजुलीले बताए ।

जनयुद्ध दिवसको सन्दर्भमा आयोजित शुभकामना आदनप्रदान एवम् सपथग्रहण तथा प्रशिक्षण कार्यक्रम अन्र्तगत चौतारा साँगाचोकगढी नगरपालिकामा नेकपा (माओवादी केन्द्र) का केन्द्रिय सदस्य कृष्णप्रसाद सापकोटा, मेलम्ची नगरपालिकामा डिलाराम आचार्य, बाह्रबिसे नगरपालिकामा रेखा शर्माले सम्बोधन गरेका थिए । त्यस्तै भोटेकाशी गाउँपालिकामा सरल सहयात्री पौडेल, लिसंखुपाखर गाउँपालिकामा माधव सापकोटा, जुगल गाउँपालिकामा चन्द्र सापकोटा, इन्द्रावती गाउँपालिकामा गोबिन्द पराजुली, पाँचपोखरी थाङ्पाल गाउँपालिकामा युवराज दुलाल, हेलम्बु गाउँपालिकामा बलराम बिक, सुनकोशी गाउँपालिकामा रामदिप आचार्य, बलेफी गाउँपालिकामा रामप्रसाद सापकोटा र त्रिपुरासुन्दरी गाउँपालिकामा केशव नेपालले सम्बोधन गरेका थिए ।

यता अखिल (क्रान्तिकारी) सिन्धुपाल्चोकले सदरमुकाम चौतारामा २७औं जनयुद्ध दिवसको अवसरमा दीपप्रज्वलन गरेको छ । साँझ शहीदचोकमा गरिएको दीप प्रज्वलन कार्यक्रममा नेकपा (माओवादी केन्द्र) बागमती प्रदेशका सल्लाहकार एवम् चौतारा साँगाचोकगढी नगरपालिकाका प्रमुख अमानसिं तामाङले सम्बोधन गरेका थिए ।