क्याम्पस कि पार्टी कार्यलय ?

विगतका केही बर्षदेखिनै हामी विद्यार्थीहरु निकै सोचमग्न छौँ कि हाम्रो चौतारा क्याम्पस शैक्षिक संस्था भएरपनि किन पार्टीको चाप्लुसिगत व्यवहार र क्रियाकलापबाट ग्रस्त छ ? के यहाँ यो सबैकुरा छुट छ ? यसमा कसको कमजोरी ? स्थानीय सरकार, विद्यालय व्यवस्थापक समिति, या फेरि हामी विद्यार्थीको दविएका आवाज ??

यसो त हाम्रो क्याम्पसमा कहिले कुन पार्टीको अधिवेशन चालुहुन्छ, कहिले मतदान कार्यक्रम, कहिले बैठक, कहिले महाअधिवेशन यतिमात्र हो र ! अझ कहिले त विवाह नै पनि हुन्छ । क्याम्पस शैक्षिक क्रियाकलाप गर्नका लागि निर्माण गरिएको हो कि, सिन्धुपाल्चोकमा रहेका पार्टीगत विधि विधान चलाउन सहज हुन्छ भनेर बनाईएको हो ? के हाम्रो क्याम्पसले नै पार्टीको कार्यक्रम गर्न भवन दिनुपर्ने सम्झौता गरेको छ र ?

चौतारामा अरु कतै सेमिनारहलहरु पाईन्न कि, छैन ? यस्ता विविध क्रियाकलाप हुदाँ पनि किन चुपचाप छ क्याम्पस ? कि चुपचाप बस्नुपर्ने बाध्यता छ ? बारम्बार हाम्रो प्रश्न अनि कौतुहलता मन मगजमा दौडिएता पनि हामीले आजसम्म यसको जबाफ पाएका छैनौं । हाम्रो क्याम्पसले विगतदेखि अनगिन्ती यस्ता समस्या भोग्दै आएको छ, र पनि हामी मौन किन ? कतिन्जेल ? अब अत्ति भयो ।

१. क्याम्पसले विगतबाट ऋण भोग्दै आएको छ,
२. विद्यार्थीले क्याम्पसमा मासिक शुल्क बृद्धि भो, कम गरिदिनुस् भनिएको छ,
३. लाईबेरिमा अतिरिक्त पुस्तकहरु समयानुकूल नयाँ थप्न गा¥हो भएको छ,
४.कुनै कार्यक्रम चलाउनुपर्दा भवन छ साउण्डसिस्टम को राम्रो स्रोत छैन,
५. विद्यार्थीको अतिरिक्त क्रियाकलाप छ, प्रस्तुत गर्न हामीले अरु विद्यालयमा नृत्य पोषाक माग्नु पर्ने नाजुक स्थिति छ,
६. खेलकुद सामग्री छैन । हो हामीलाई आजसम्म यस्ता कुराहरुमा के कस्ता समस्या छ हाम्रो विद्यालय र विद्यार्थीहरुमा भनेर कसैले सोधिएको छैन । खास गरी भन्ने हो भने सिन्धुपाल्चोक जिल्ला सदरमुकाममा रहेको एउटै मात्र उच्च शिक्षा हाँसिल गराउने हाम्रो ‘चौतारा बहुमुखी क्याम्पस, व्यवस्थीत र मर्यादित’ बनाउन न त हामीलाई नगर सरकारले नत प्रदेश सरकारले नै सहयोग गर्न क्याम्पसप्रति ध्यानाकर्षण गर्यो भन्ने कुरामा हामी निक्कै गम्भीर र दुःखी छौँ ।

कहिलेकाहीँ यसै विद्यालयमा अध्ययन गरेका भूपु विद्यार्थी समूह आल्मोनाई एसोसिएसन, विद्यालय व्यवस्थापन समिति, अनेरास्ववियु (क्रान्तिकारी) र केही व्यक्तिहरुले भने विद्यालयको हरेक गतिविधिमा बारम्बार सहयोग गरेको देखिन्छ । तर हाम्रो क्याम्पसमा पार्टी र पक्षको चर्चा गर्ने आफ्नो पार्टी चलाउन होडबाजीमा विद्यार्थी संगठन बनाउने कार्यन्वयन मा केही काम नगर्ने र विद्यार्थीको समस्या र आवाजलाई नउठाउने ? यहाँ पाटसर््गत कार्यक्रम गर्ने जस्ता क्रियाकलाप आगामी दिनमा निषेध गरियोस् ।

यो विषयमा गम्भीर भएर लागि पर्न र ध्यानाकर्षण गर्न हामी सम्पूर्ण व्यक्ति, विद्यालय व्यवस्थापक समिति, शिक्षक शिक्षाका, नगर र प्रदेश सरकारलाई अनुरोध गर्दछौं । साथै यो विद्यार्थीको भविष्यसँग जोडिएको हुदाँ यो विषयमा खेलाची नगरिदिनुहुन हामी सहस्र आग्रह गर्दछौं ।

यदि हाम्रो शैक्षिक संस्थालाई कसैले स्वतन्त्रत रुपमा सहयोग गर्छ भने त्यसलाई स्वीकार गर्नु हाम्रो दायित्व हो । तर सहयोगको नाममा विविध प्रचारप्रसार गर्ने पार्टीगत कार्यक्रमको लागि भवन माग गर्ने, अधिवेशन गर्ने, मतदान कार्यक्रम चलाउनेजस्ता कार्य गर्न क्याम्पसमा निषेध गरियोस् । अर्को कुरा क्याम्पसमा विद्यार्थी संगठन निर्माण विद्यार्थीको समस्या उजागर गरि विद्यार्थी र विद्यालय सुधार गर्ने हेतुले बनाउनु पर्ने हो, तर यसको प्रयोग पद र पावरका लागि गरिने विद्यालय तोडफोड गर्न अघिसरि गुन्डागर्दी गर्ने त्यस्ता क्रियाकलाप गरिएमा विद्यार्थी र विद्यालय भन्दा बाहिर सोच्ने पार्टीगत संगठन भएमा तुरुन्त यस्ता पार्टीगत संगठन विद्यालयमा खारेज गरि सदाका लागि निषेध गरियोस् भन्ने कुरामा विद्यालय व्यवस्थापक समिति र विद्यालय परिवारमा हामी यो कुरा प्रस्ताव गर्न चाहान्छौं ।

किनकी (क्युएए) प्राप्त गर्ने चरणमा लिईएको ईन्टरभ्यूमा नै भनिएको थियोे यदि कुनै पार्टीगत समूह छ भने हरेक महिनामा विद्यार्थीको अध्ययन सम्बन्धि गरेका गतिबिधि रेकर्ड हामीले फोटो सहितको माइनर बनाएर बुझाउनुपर्ने र यदि यस्तो गतिविधि नभए अर्थ नरहने कुरा हामीलाई त्रिभुवन विश्वविद्यालयद्वारा अवगत गराईएको थियो ।

‘हाम्रो विद्यालय, राम्रो विद्यालय’ बनाउन हामीलाई सम्पूर्ण व्यक्ति र तहगत सरकारले सहयोग गर्नु अत्यन्त आवश्यक छ । शिक्षकलाई तलब दिन गाह्रो हुदाँ विद्यार्थीहरुलाई मासिक शुल्कभार बढी भएको अवगत गराउँदै, यस्तै विद्यालयमा आवश्यक भएका सम्पूर्ण कुरामा सबैको ध्यानाकर्षण हुनेछ भन्ने विश्वास हामी व्यक्त गर्दछौं । साथै हाम्रो यस शैक्षिक संस्थालाई आगामी दिनमा कुनैपनि पार्टीले आफ्नो कार्यसम्पन्न गर्ने भवन बनाउने छैन, यसमा विद्यालय र विद्यार्थी गतिविधिगत कार्यक्रममात्र चलाउने क्रियाकलापहरु हुनेछन् भन्ने कुरामा हामी आशावादी छौँ । अन्यथा हामीले पुनःआवाज उठाउन बाध्य हुनेछौं र हामी यस्ता क्रियाकलापहरु कदापि स्वीकार नगर्ने कुरा सम्पूर्णमा स्पष्ट पार्न चाहान्छौ ।

(लेखिका चौतारा क्याम्पमा अध्ययन गर्छिन् ।)