बर्डफ्लुको मार, कृषकलाई सर्तक रहन आग्रह

चौतारा । सिन्धुपाल्चोकसँगै बागमती प्रदेशका ६ जिल्लामा बर्डफ्लु फैलिएको छ । कृषि तथा पशुपक्ष विकास मन्त्रालयका अनुसार हालसम्म सिन्धुपाल्चोक, काठमाडौँ, ललितपुर, भक्तपुर, चितवन र मकवानपुर जिल्लामा बर्डफ्लु देखिएको हो ।

मन्त्रालयका सचिव डा. शरणकुमार पाण्ड्का अनुसार बर्डफ्लुका कारण हालसम्म करिब तीन करोड भन्दाबढीको क्षति भएको अनुमान गरिएको छ । प्रदेशमा माघ १६ गतेदेखि हालसम्ममा संक्रमण विभिन्न जिल्लामा फैलिरहेको छ । बर्डफ्लु देखिएका स्थानमा हालसम्म ५८ हजार २६१ पक्षी, २२ हजार ३४ वटा अण्डा र ११ हजार ४३९ केजी दाना सुरक्षित तरिकाले नष्ट गरिएको पनि सचिव पाण्डेले बताए । संक्रमण देखिएका स्थानमा पूर्णरूपमा निःसंक्रमणका कार्य गरिएको र अन्यत्र फैलन नदिन नमूना संकलन र निगरानी भइरहेकोसमेत मन्त्रालयका सचिव पाण्डेले जानकारी दिए ।

बर्डफ्लुका कारण सिन्धुपाल्चोकमा दुई हजार १८ वटा पक्षी र एक हजार ९५० किलो दाना नष्ट गरिएको छ । त्यस्तै काठमाडौँमा १९ हजार ५०६ वटा पक्षी, पाँच हजार ६५२ वटा अण्डा र चार हजार १०८ किलो दाना, चितवनमा नौ हजार ६७० पक्षी, दुई हजार ३८६ वटा अण्डा, एक हजार ५०० किलो दाना, भक्तपुरमा २४ हजार ३१९ वटा पक्षी, १३ हजार ९० वटा अण्डा, दुई हजार ९०० किलो दाना, मकवानपुरमा ३१६ वटा पक्षी, १६ वटा अण्डा, ८२ किलो दाना, ललितपुरमा दुई हजार २६२ वटा पक्षी, ९०० किलो दाना नष्ट गरिएको हो ।

छ जिल्लामा बर्डफ्लुका ५७ हजार ११४ वटा विभिन्न जातका कुखुरा नष्ट गरिएको कृषि तथा पशुपक्षी मन्त्रालयका सचिव पाण्डेले उल्लेख गरे । उनले क्षति बेहोरेका कृषकलाई संघीय र स्थानीय सरकारसँगको सहकार्यमा क्षतिपूर्ति दिने तयारी भइरहेको बताए ।

संघीय सरकारले तोकेको मापदण्ड र नीतिअनुसार क्षति बेहोरेका कृषकलाई राहतस्वरुप क्षतिपूर्ति दिने सरकारको योजना रहेको उनले जानकारी दिए । मन्त्रालयले बर्डफ्लुुको समयमै निदान र नियन्त्रणका लागि विभिन्न पहल गरिरहेको उनको भनाइ छ । प्रदेशका अन्य जिल्लामा बर्डफ्लु रोग फैलन नदिन परीक्षणको दायरालाई फराकिलो बनाइएको उनले बताए । एक क्षेत्रबाट अर्को क्षेत्रमा संक्रमण फैलन नदिन नमूना संकलन, परीक्षण र निगरानी बढाइएको उनले बताए ।