नगरप्रमुख तामाङले दिए राजीनामाः उम्मेद्वारी दिन बाटो खुला

चौतारा । सिन्धुपाल्चोकको चौतारा साँगाचोकगढी नगरपालिकाका प्रमुख अमानसिं तामाङले पदबाट राजीनामा दिएका छन् ।

२०७४ को स्थानीय निर्वाचनमा नेकपा माओवादी केन्द्रबाट विजयी बनेका तामाङले विहीबार राजीनामा दिएका हुन् । उनले पदबाट राजीनामा दिएसँगै आसन्न स्थानीय तह निर्वाचनमा उम्मेदवार बन्न बाटो खुलेको छ । उनले यो पटक पनि नगरप्रमुखको दावी गरिरहेका छन् ।

स्थानीय तह निर्वाचनमा बहालवाला जनप्रतिनिधिले राजीनामा दिएर मात्र उम्मेदवार बन्न पाउने प्रावधान अनुसार आफूले राजीनामा दिएको तामाङले बताए । उनले यस अघि नगरपालिकाको तर्फबाट प्रयोग गर्दै आएको सवारीसाधन, सञ्चारसाधन र आवाससमेत समेत फिर्ता गरेका छन् ।