‘हेवीवेट’ नेता भोट खसाल्न गृहनगर

चौतारा । स्थानीय तह निर्वाचनमा मदतान गर्न सभामुख अग्निप्रसाद सापकोटा बिहीबार गृहनगर आइपुगेका छन् । उनी चौतारा साँगाचोकगढी नगरपालिका– ५ कुविण्डेका मतदाता हुन् ।

स्थानीय सेतीदेवी पञ्चकन्या मावि मतदान केन्द्रमा उनले मतदान गर्ने छन् । सभामुख सापकोटाले उक्त केन्द्रबाट पहिलो मत खसाल्ने कार्यक्रम रहेको उनका प्रेसबिज्ञ श्रीधर न्यौपानेले बताए । ‘गाउँ सरकार चुन्ने चुनावमा भोट खसाल्न उहाँ (सापकोटा) उत्साहित हुनुहुन्छ,’ उनले भने । सभामुख सापकोटाका भाइ कृष्णप्रसाद सापकोटा चौतारा नगरमा प्रमुखको उम्मेदवार छन् । उनी मााओवादी–एकीकृत समाजवादी गठबन्धनको तर्फबाट उम्मेदवार बनेका हुन् ।

राप्रका नेता पशुपति शम्सेर जबरा पनि मतदान गर्न शुक्रबार सिन्धुपाल्चोक आउँदै छन् । उनी पाँचपोखरी थाङपाल गाउँपालिका– ५ बाँसखर्कका मतदाता हुन् । उनले स्थानीय भीमविद्याश्रम मावि केन्द्रमा मतदान गर्ने छन् । राजधानीदेखि मतदान केन्द्र बाँसखर्कसम्म आउन उनले जिल्ला प्रशासन कार्यालयबाट सवारी प्रवेश अनुमति लिइसकेको राप्रपा नेता जितबहादुर भारतीले बताए ।

२०७४ को प्रतिनिधिसभा निर्वाचनअघि जबरा सुनकोसी गाउँपालिकाका मतदाता थिए । उक्त निर्वाचनमा प्रतिनिधिसभा क्षेत्र नं. २ मा उम्मेदवार बनेपछि उनले मतदान केन्द्र बदलेका हुन् । २०३४ मा सुनकोसीको पांग्रेटारमा घर, घँडेरी किनेर राजनीति थालेका उनी अझै सिन्धुको राजनीतिमा केन्द्रित छन् । उनकी श्रीमती र छोरी देबीयानी राणा पनि बाँखसर्ककै मतदाता हुन् । तर उनीहरुले यो चुनावमा भोट खसाल्ने छैनन् । दुबै अहिले भारतमा रहेको नेता भारतीले जानकारी दिए ।

त्यस्तै एमाले नेता तथा पूर्वमन्त्री अमृत बोहोराले गृहगाउँ त्रिपुरासुन्दरी गाउँपालिकाको पिस्करबाट मतदान गर्दै छन् । उनकी श्रीमती एमाले नेतृ अष्टलक्ष्मी शाक्य भने यहाँको मतदाता छैनन् । उनी काठमाडौंकी मतदाता हुन् । कांग्रेस केन्दीय सदस्य तथा पूर्वमन्त्री मोहनबहादुर बस्नेत पनि मतदान गर्न गृहनगर आइसकेका छन् । बाह्रविसे नगरपालिकाका उनले क्षमादेबी मावि केन्द्रबाट मतदान गर्ने छन् ।

एमाले स्थायी समिति सदस्य तथा पूर्वमन्त्री शेरबहादुर तामाङ पनि मतदानका लागि गृह नगर आइसकेका छन् । उनले मेलम्ची नगरपालिकाको सिन्धुकोट केन्द्रबाट मतदान गर्ने छन् । उनकी श्रीमती एमाले नेतृ उषाकला राई भने यहाँको मतदाता छैनन् । उनी खोटाङ जिल्लाको मतदाता हुन् ।

बागमती प्रदेशका स्वास्थ्यमन्त्री निमा लामा पनि मतदानका लागि गृहगाउँ हेलम्बु गाउँपालिका आइपुगेका छन् । उनी किउलका मतदाता हुन् । त्यस्तै मत दिन बागमती प्रदेश सदस्य तथा पूर्वमन्त्री युवराज दुलाल (चौतारा), अरुण नेपाल र सरेश नेपाल (सुनकोसी) पनि आ–आफ्नो जन्मस्थानमा आइसकेका छन् ।