जिसस सिन्धुका लागि उम्मेद्वारी दर्ता, कांग्रेस-समाजवादी र माओवादी-एमालेबीच गठबन्धन

चौतारा । जिल्ला समन्वय समिति (जिसस) सिन्धुपाल्चोकको आसन्न निर्वाचनमा नेपाली कांग्रेस–नेकपा (एकीकृत समाजवादी) र नेकपा (माओवादी केन्द्र)–नेकपा (एमाले) बीच गठबन्धन भएको छ ।

जेठ २९ गते हुने प्रमुख, उपप्रमुखसहित नौ सदस्यीय समन्वय समिति निर्वाचनको लागि जिल्लाको पहिलो ठूलो दल कांग्रेस र चौथो पार्टी समाजवादीबीच तालमेल हुँदा क्रमशः दोस्रो र तेस्रो दल माओवादी–एमालेबीच नयाँ गठबन्धन बनेको हो । सत्तारुढ गठबन्धनबाट कांग्रेसले प्रमुखसहित सात सदस्य पाउँदा समाजवादीले उपप्रमुखसहित दुई पद पाउने सहमति भएको छ । यो गठबन्धनबाट कांग्रेको तर्फबाट प्रमुखमा बालकृष्ण श्रेष्ठ र समाजवादीका पदमनाथ नेपालले उपप्रमुखमा उम्मेदवारी दर्ता गराएका छन्। कांग्रेसले ६ र समाजवादीले एक सदस्य बाँडेर मनोनयन दर्ता गराएका हुन् ।

सत्तारुढ–प्रतिपक्ष गठबन्धनबाट माओवादीले प्रमुखसहित चार सदस्य र एमालेले उपप्रमुखसहित पाँच सदस्य लिएर उम्मेदवारी दिएका छन् । यो गठबन्धनले प्रमुखमा माओवादीका गणेश बिक र उपप्रमुखमा एमालेका जेपी सिलवालले उम्मेद्वारी दिएका छन् । माओवादीको भागमा थप तीन सदस्य पर्दा एमाले चार सदस्य लिएको छ ।

सिन्धुपाल्चोकका १२ स्थानीय तहका प्रमुख/अध्यक्ष र उपप्रमुख/उपाध्यक्षले समन्वय समिति निर्वाचनमा मतदान गर्न पाउँछन् । यसरी हेर्दा जिसस चुनावमा २४ जना मतदाता रहन्छन् । कांग्रेस–समाजवादी गठबन्धनसँग १३ मत रहेको छ । यो गठबन्धनसँग ५१ प्रतिशतसहित बहुमत रहेको छ । त्यस्तै माओवादी–एमाले गठबन्धनसँग ११ मत रहेको छ । जिसस जित्न यो गठबन्धनलाई दुई मत पुग्दैन । अन्तिमसम्म अन्यथा नभए कांग्रेस–समाजवादीले जिसस बनाउने पक्का जस्तै छ ।

स्थानीय तह चुनावमा कांग्रेसले १२ प्रमुख/अध्यक्ष, उपप्रमुख/उपाध्यक्ष जितेको थियो । तीन अध्यक्ष र चार उपाध्यक्ष जितेको एमालेसँग सात मत छ । चार पालिकामा प्रमुख/अध्यक्ष मात्रै जितेको माओवादीसँग चार मत छ । चौतारा–साँगाचोकगढी नगरको उपप्रमुख जितेको समाजवादीसँग एक भोट छ ।