जिसस सिन्धुमा नेपाली कांग्रेसका श्रेष्ठ निर्वाचित

चौतारा । सिन्धुपाल्चोक जिल्ला समन्वय समितिमा कांग्रेस र नेकपा (एकीकृत समाजवादी) को गठबन्धनको प्यानल नै निर्वाचित भएको छ ।

आईतबार सम्पन्न निर्वाचनमा जिल्ला समन्वय समिति प्रमुखमा गठबन्धनबाट नेपाली कांग्रेसका उम्मेदवार बालकृष्ण श्रेष्ठ १३ मत ल्याई निर्वाचित भए । श्रेष्ठ बाह्विसे नगरपालिका– ४ बाट वडा सदस्यमा निर्वाचित भएका थिए । उनको प्रतिस्पर्धी नेकपा (माओवादी केन्द्र) का उम्मेदवार गणेश विकले १० मत प्राप्त गरेको निर्वाचन अधिकृतको कार्यालयले जनाएको छ ।

उपप्रमुखमा गठबन्धनबाट नेकपा (एकीकृत समाजवादी) का पदमनाथ नेपाल १३ मत प्राप्त गरी विजयी भए । नेपालका प्रतिस्पर्धी एमालेका उम्मेदवार जंगप्रताप सिलवाल (जेपी) ले ११ मत प्राप्त गए । उपप्रमुखमा निर्वाचित नेपाल स्थानीय तह निर्वाचनमा बलेफी गाउँपालिका– ४ विन्जेलबाट वडा सदस्यमा निर्वाचित भएका थिए ।

समन्वय समितिको सदस्यमा समाजवादी र कांग्रेस गठबन्धनबाट जितबहादुर कार्की, बलराम केसी, विक्रम तामाङ, अम्बिका बस्नेत, ढकमाया सेतो कोईराला, सोममाया श्रेष्ठ, तारा नेपालीले १३/१३ मत प्राप्त गरेको निर्वाचन अधिकृत चन्द्रप्रकाश तिवारीले जानकारी दिए ।

निर्वाचनमा नेकपा (माओवादी केन्द्र) र नेकपा (एमाले) बीच गठवन्धन भएको थियो । गठवन्धन अनुसार एमालेसँग ७ भोट र माआवादी केन्द्रसँग ४ भोट रहको थियो । तर गठवन्धनमा घात भएपछि ११ भोट पाउनु पर्ने माओवादीले जम्मा १० भोट मात्र पाए । एक भोट प्रमुखमा खाली रहेको मूख्य निर्वाचन अधिकृतको कार्यालयले जनाएको छ ।

१२ वटा स्थानीय तह रहेको सिन्धुपाल्चोकमा जिसस निर्वाचनका लागि कुल २४ मतदाता थिए । तर सदस्य तर्फको मतदानमा एमालेले माओवादीलाई र माओवादीले एमालेलाई धोका दिएको मत परिणामले देखाएको छ । सदस्य तर्फ माओवादीका उम्मेदवार एमबहादुर पौडेलले ४, संजीव तामाङले ३ मत मात्रै ल्याए । सदस्य तर्फ नै एमालेका राधिका तिमिल्सिनाको ५, सुनिल पौडेलको ४ र सुस्मीता तामाङको ५ मत मात्रै थियो ।

निर्वाचनमा एक प्रमुख, एक उपप्रमुख र सात जना सदस्य पदका लागि गत २६ गते १८ जनाले उम्मेदवारी दर्ता गराएका थिए ।