हाम्रो दुई वर्षे यात्राः जनताको आवाज बन्यौं

ग्लोबलपाटी डटकम आजबाट दोस्रो वर्ष पार गरी तेस्रो वर्षमा प्रवेश गरेको छ । यस अवसरमा हामी पाठकहरुसँग उत्साह बाँड्न चाहन्छौं । यतिन्जेलसम्म पाठकहरुबाट प्राप्त विश्वास, उत्प्रेरणा र खबरदारी हाम्रा अमूल्य आर्जन हुन् । विश्वसनीय अनलाइन हुनुको परिचय पनि यही हो भन्ने हाम्रो ठम्याइ छ । यसको निरन्तरताको अपेक्षा राख्दछौं ।

२०७७ साउन १८ गते हामी तपाईंमाझ आएका थियौं । यस अवधिमा हाम्रो सबैभन्दा ठूलो प्राप्ति भनेको तपाईंको अगाध माया र सद्भाव हो । हामीले तपाईंबाट थप सुझाव र रचनात्मक सल्लाहको अपेक्षा गरेका छौँ । यो माया र सद्भावलाई बचाएर राख्ने चुनौतीबीच हामीले पाठक र दर्शकसँग प्रतिबद्धता जनाउने बेला भएको छ ।

निष्पक्ष र व्यावसायिक पत्रकारिताभन्दा हाम्रो अर्को लक्ष्य र प्रतिवद्धता छैन । दलगत या अन्य कुनै प्रकारका कर्पोरेट स्वार्थलाई विगतमा जसरी नै हामी आगामी दिनमा पनि प्रश्रय दिने छैनौँ । यस अवधिमा हामीले बाटो बिराएकाहरूप्रति निरन्तर खबरदारी गर्यौं, चाहे सत्ता सञ्चालक हुन् वा कर्मचारी, सार्वजनिक जिम्मेवारीमा रहेकाहरू हुन् वा समाजका सरोकारवाला व्यक्ति, संस्था र निकायहरू हुन् । हामी चाहन्छौँ, हामीप्रति पनि नागरिकको यस्तै खबरदारी जारी रहनुपर्छ ।

जुनसुकै माध्यमबाट गरिने पत्रकारिता होस्; त्यो मूलतः भूइँमान्छे र राज्यबीचको सेतु हो । राज्यमाथिको प्रश्नकर्ता हो । प्रतिपक्ष हो । सूचनाको हुलाकी हो । सरकार फेरिए पनि ग्लोबलपाटीले यो दायित्व भुलेको छैन । विगतमा प्रकाशित हाम्रा सामग्रीहरु प्रमाणका रुपमा सधैं रहनेछन् । विश्वसनीयतालाई केन्द्रमा राखेर अझै पूर्ण र सम्पूर्ण अनलाइन बनाउने हाम्रो प्रयास जारी नै छ । सबै प्रयत्नका केन्द्रमा स्वतन्त्र, जिम्मेवार र जवाफदेही पत्रकारिता नै हाम्रो मूल मन्त्र हुनेछ ।

विधिको शासन, सामाजिक न्याय, सुशासन र मानवअधिकार लोकतन्त्रका प्राण हुन् । यी प्राण बचाउने दायित्व नागरिक, राजनीतिक दल, कर्मचारीतन्त्रसँग मात्र होइन, हामीमा पनि उत्तिकै छ । यसलाई हामीले दह्रोसँग र जिम्मेवारीपूर्वक आत्मसात् गरेका छौँ, गरिरहनेछौँ । यस अवधिमा हामीले जे गर्यौं, पाठक र दर्शकले मूल्याङ्कन गर्ने कुरा हो तर हामी यतिमै चित्त बुझाएर बस्नेछैनौँ । सूचना, विचार र बहस सँगसँगै राष्ट्र र समाजलाई दिशानिर्देश गराउन सकियो भने मात्र हामी हाम्रो उद्देश्य र कर्ममा सफल बन्न थालेको ठान्नेछौँ ।

अन्त्यमा, दुई वर्षको यो यात्रामा साथ दिनुहुने समस्त पाठक, दर्शक, विज्ञापनदाता र शुभेच्छुकप्रति हार्दिक आभार व्यक्त गर्दै निरन्तर सहयोग र सहकार्यको अपेक्षा गरेका छौँ ।

– सुन्दर शिरीष (सम्पादक)