१ करोड ७१ लाख लागतमा निर्मित विद्यालय भवन समुदायलाई हस्तान्तरण

चौतारा । नेपाल हिल्फे वाइलग्रिस ईभी जर्मनीले सिन्धुपाल्चोकको चौतारा साँगाचोकगढी नगरपालिका– ९ सिरानचौरमा रहेको सेतीदेवी आधारभुत विद्यालयको भवन निर्माण सम्पन्न गरी समुदायलाई हस्तान्तरण गरेको छ ।

कुल १ करोड ७१ लाख रुपैंयामा भवन निर्माण पूरा भएको निर्माण सहकार्य संस्था जनहित ग्रामीण सेवा समितिले जनाएको छ । १ करोड २९ लाखको लागतमा भवन, ३४ लाख लागतमा घेराबारका साथै शौचालय र खेलमैदानसहित सुविधा सम्पन्न विद्यालय तयार भएको समितिका कार्यकारी निर्देशक राजेन्द्र शर्माले जानकारी दिए । विद्यालयको जग्गाका लागी स्थानीयले ८ लाख जन श्रमदानबाटै जुटाएका थिए । जग्गा सम्याउनको लागि चौतारा साँगाचोकगढी नगरपालिकाले ३ लाख रुपैंया समेत प्रदान गरको थियो ।

नव निर्मित विद्यालय भवन सोमबार एक कार्यक्रमका बीच नेपालहिल्फे वाइलग्रिस ईभीका अध्यक्ष म्यानफ्रिड लिन्डरले विद्यालय ब्यवस्थापन समितिलाई हस्तान्तरण गरे । अध्यक्ष लिन्डरको टोलीले कक्षाकोठाको अवलोकन समेत गरेको थियो । कोभिडका कारण विद्यालय निमार्ण सम्पन्न गर्न ढेड वर्ष लागेको जनहित ग्रामीण सेवा समितिका अध्यक्ष भरत सापकोटाले बताए । कक्षा ४ सम्म पढाई हुने विद्यालय भूकम्प पछि अस्थाई सिकाई केन्द्रबाट पठनपाठन हुँदै आएको थियो । विद्यालयको लागि समुदायको अपनत्व र सहयोगका कारण भवन लगायतका संरचना निमार्ण उत्कृष्ट भएको अध्यक्ष सापकोटाले बताए ।

नेपाल हिल्फे वाइलग्रिस ईभी जर्मनीले सिन्धुपाल्चोकमा १९ वटा विद्यालय सहित थप सहयोगका २ गरी २१ वटा विद्यालय निमार्ण गरेको हिल्फेका कार्यक्रम संयोजक श्याम पण्डितले बताए । फर्निचरदेखि शौचालय ल्याब लगायत विद्यालयले माग गरेका आवश्यकता पूरा गर्दै गएको हिल्फेका कार्यक्रम संयोजक पण्डितको भनाई छ । नेपाल हिल्फे वाइलग्रिसले विशेषतः च्यारीटी शो गरेर रकम संकलन गर्दै स्वयम्सेवक ढंगले रकम सहयोग गर्ने गरेको छ । पर्वतारोही, ईन्जिनियर, डाक्टर, अफिसरहरु लगायत जर्मनी विद्यार्थीहरुबाट संकलित रकमबाट हिल्फे वाइलग्रिसले काम गर्दै आएको छ ।

यसैबीच सोमबार नै नेपाल हिल्फे वाइलग्रिसको आर्थिक सहयोग र जनहित ग्रामीण सेवा समितिको सहकार्यमा मेलचौर स्थित ज्ञान मन्दिर माध्यमिक विद्यालयको शिक्षकहरु बस्ने क्वाटरको पनि उद्घाटन र हस्तान्तरण गरिएको हो । शिक्षकहरुलाई आवासको रुपमा प्रयोग गरिनेसो क्वाटर निमार्णको लागि संस्थाले ६५ लाख उपलब्ध गराएको हो ।