आर्थिक तथा सामाजिक विकासमा कटिबद्ध रहनेछु – पौडेल

सिन्धुपाल्चोक जिल्लाको कर्णाली भनेर चिनिने जुगल गाउँपालिकाका मतदाताले लोकतान्त्रिक बाम गठबन्धनको तर्फबाट प्रदेश सभाको लागि उम्मेदवार बनेका सरल सहयात्री पौडेललाई हर्ष उल्लासका साथ स्वागत गरेका छन् ।

उम्मेदवार पौडेलले घरदैलो तथा मतदाता भेटघाट सुरु गरेको गाउँघरमा स्थानीयले गरेको स्वागत र उल्लासले पौडेललाई अनुमोदन गरेको प्रस्ट देख्न सकिन्थ्यो ।

सो क्षेत्रमा मतदाताहरूले निकै सरल र शालीन स्वभावका उम्मेदवार पौडेल जस्तो युवा उम्मेदवार पाउनु आफ्नो गर्भको कुरा भएको अभिव्यक्ति दिएका छन् । ‘यस क्षेत्रका लागि सङ्घमा र प्रदेश दुवै क्षेत्रमा उहाँहरू जस्ता युवा उम्मेदवार पाउनु नै हाम्रो गर्भको कुरा हो भोट के मा हाल्ने भनेर सोच्नुपर्ने नै छैन यस पटकको भोट उहाँहरूलाई नै हो ।’ स्थानीय रामशरण पराजुलीले भने ।

उनले भने, ‘चुनावको समयमा झुट आश्वासन त जुनसुकै उम्मेदवारले पनि दिने रहिछन्, हामीले काम गर्ने उम्मेदवार चिन्न नसक्दा जुगलको समग्र विकासमा हामी ५ वर्ष पछि परिसकेका छौँ । त्यो गल्ती हामीले दोहोराउने छैनौँ यो पटक काम गर्ने दुख सुखमा साथ दिनेलाई नै हो र हाम्रो दुख सुखमा रहने पनि उहाँहरू नै हो ।’

जुगल गाउँपालिकाको सेलाङ, गोल्चे, गुम्बा, पाङताङ, बराम्ची, हगाम, याङ्लाकोट लगाएत विभिन्न टोलवस्तीमा मतदाता भेटघाटमा पुगेका उम्मेदवार पौडेलसँग मतदाताले पालिका अध्यक्ष जस्तो जितेर गइसकेपछि आफुहरुलाई नबिर्सन आग्रह समेत गरेका थिए ।

जुगल गाउँपालिकाका स्थानीय प्राय सबैको एउटै माग थियो बर्खाको समयमा गाउँसम्म गाडी चढेर आइपुग्न सकियोस्, गाउँमा नै रोजगारीको अवस्था सिर्जना होस र आफ्ना छोराछोरीले रोजगारका लागि देश छाडेर बिदेसिन नपरोस् ।

स्थानीयले गरेका गुनासोको सम्बोधन गर्दै उम्मेदवार पौडेलले बलेफी कात्तिके सम्मको बाटो तत्काल कालोपत्रे हुने अन्तिम चरणमा रहेको स्मरण गराउँदै अन्य शाखा बाटोहरूको स्तर उन्नति आफ्नो कार्यकालको प्रमुख एजेन्डा हुने बताए ।

‘मेरो कार्यकालमा विकास निर्माणले पक्कै पनि जुगल गाउँपालिकाको मुहार फेर्ने छ, पूर्वाधारका विकास सँगसँगै आर्थिक तथा सामाजिक पक्षको विकासका लागि समेत कटिबद्ध रहेर म लग्ने छु ।’उम्मेदवार पौडेलले भने ।

पालिकाका गठबन्धन दलका नेता तथा कार्यकर्ताको साथमा मतदाता भेटघाट तथा घरदैलो कार्यक्रममा मतदाताको घरदैलोमा पुगेका पौडेललाई मतदाताहरूले उल्लासका साथ गरेको स्वागत र सत्कारले जुगल गाँउपालिकाले पौडेललाई रुचाएको स्पष्ट देख्न सकिन्छ ।