बालविकास सहजकर्ताहरुको लागि मन्टेश्वरी तालिम प्रदान

चौतारा । चौतारा साँगाचोकगढी नगरपालिकाले वालबिकास सहजकर्ताहरुको लागि ५ दिने मन्टेश्वरी तालिम प्रदान गरेको छ ।

तालिममा १० जना प्रशिक्षक र ६४ जना वालबिकास सहजकर्ताहरुको सहभागीता जनाएका थिए । नगर शिक्षा शाखाका विद्यालय निरीक्षक गोपाल खड्काका अनुसार यो तालिम न्यूनतम मापदण्ड अनुरुप बालमैत्री विद्यालय बनाउने ५ बर्षे रणनीति अनुरुपको पहिलो कार्यक्रम हो ।

तालिमको समापन गर्दै नगर प्रमुख कृष्णप्रसाद सापकोटाले आर्जन गरेको सीप र विषयबस्तुका गम्भीरतालाई आत्मसात गरि सैद्धान्तिक ज्ञानलाई व्यवहारमा लागु गर्न निर्देशन दिए । शिक्षामा नगरले केहि नयाँपन दिने लक्ष्यसहित स्थलगत अवलोकन सम्पन्न गरेको भन्दै सापकोटाले शिक्षामा गुणात्मक परिवर्तन गर्ने ध्येयका साथ नगरले बालविकास सहजकर्ता नभएका विद्यालयलाई सहजकर्ता कोटा उपलब्ध गराउने, न्यूनतम मापदण्ड अनुरुपको कक्षाकोठा व्यवस्थापन, अभिभावक शिक्षा प्रदान गर्दै बालमैत्री वातावरणमा दिगो सिकाई आर्जन गर्ने वातावरण बनाउने अभियानलाई ५ बर्षसम्म योजनाबद्ध रुपमा कार्यान्वयन गर्दै जाने लक्ष रहेको बताए ।

कार्यक्रममा नगर उपप्रमुख सीता थापाले केही फरकपन दिने कोसिसमा रहेकोले नगरको कार्ययोजना अनुसारको काम गर्न आग्रह गरिन् । उनले सिर्जनात्मक क्षमताको पहिचान गरि पुरस्कृत गर्ने नगरको लक्ष्य रहेको समेत बताईन् ।
तालिम अघि धेरै कुरा जानेका रहेनछौ भन्दै ५ दिने तालिममा समस्या पहिचान र समाधानको बिधि थाह पाएको सहभागी बालविकासकर्ता सहभागी रमाकुमारी चौलागाईले बताईन् । उनले तल्लो कक्षामा तिमी र तपाईं भनेर व्यवहार गर्छौ तर माथिल्लो कक्षाका शिक्षकले तँ र तेरो भनेर संस्कारका कारण आचरण बिग्रिएको भन्दै यसप्रति गम्भीर हुनुपर्ने बताईन् । साथै उनले तालिम पछि निरीक्षणको माग गरिन् ।

प्रशिक्षक भिष्ममणी पाण्डेले तालिम सकिएको होईन सुरु भएको बताए । विद्यालय, बालबालिका र अविभावककहाँ सिकेको कुरा पस्किसकेपछि मात्र तालिमले सार्थकता पाउने बताए । त्यस्तै नगर शिक्षा अधिकृत बशन्त जोशीले २०७७ सालको पाठ्यक्रम अनुसार सिकाई हुनुपर्नेमा पुरानैमा भइरहेको पाईएकोले नयाँ कार्यान्वयन गर्न निर्देशन दिएका छन् । उनले बालविकास सहजकर्ताहरुलाइ बाल मनोविज्ञान बुझेर सिकाई गर्न आग्रह गरे ।