नगर साँस्कृतिक उत्सव सम्पन्न

चौतारा । सिन्धुपाल्चोकको चौतारा साँगाचोकगढी नगरपालिकाको धार्मिक एवम् पर्यटकीय क्षेत्रको पदयात्रासँगै ‘चौतारा साँगाचोकगढी नगर साँस्कृतिक उत्सव– २०८०’ सकिएको छ ।

प्रेस सेन्टर नेपाल जिल्ला समन्वय समिति सिन्धुपाल्चोकको आयोजना र शब्द–सारथि, सिन्धु कला मन्दिर र प्रगतिशील लेखक संघ सिन्धुपाल्चोकको समन्वयमा असार १ गतेबाट साँस्कृतिक उत्सव सुरु भएको थियो । उत्सव अन्र्तगत भएको कविता प्रतियोगतामा सुषमा तिमल्सिना प्रथम भएकी छिन् । उनको सिंगो पाठशाला शीर्षकको कविता प्रथम भएको हो ।

त्यस्तै विनोद श्रेष्ठको म सिन्धु पुत्र हुँ शीषकको कविता द्वितीय र राजाराम तिवारीको कविता आह्वान तृतीय भएको हो । विजयी कविहरुलाई चौतारा साँगाचोकगढी नगरपालिकाका प्रमुख कृष्णप्रसाद सापकोटाले नगदसहित प्रमाणपत्रले सम्मान गरेका थिए । विजयी कविहरुलाई क्रमसः १० हजार रुपैंया, ७ हजार ५ सय रुपैंया र ५ हजार रुपैंयासहित सम्मान गरिएको थियो ।

उत्सव अन्र्तगत असार १ गते साँझ साँस्कृतिक साँझ, विभिन्न विषयमा कार्याशाला समेत गरिएको आयोजक प्रेस सेन्टर नेपाल सिन्धुपाल्चोकका अध्यक्ष सुन्दर शिरीषले बताए । उनले पत्रकारितासँगै संस्कृतिको जगेर्ना गर्न उत्सवको आयोजना गरिएको प्रष्ट्याए ।

उत्सवको उद्घाटन समारोहलार्ई सम्बोधन गर्दै चौतारा साँगाचोकगढी नगरपालिकाको प्रमुख कृष्णप्रसाद सापकोटाले विकास पूर्वाधारको निर्माणले मात्र नहुने भन्दै कला, साहित्यको पनि संरक्षण गरेमात्र विकासले गति लिने बताए । ‘मैले यो उत्सव अन्र्तगतका उत्कृष्ट ७ कविता सुने’, उनले भने– ‘कविता सुनिरहँदा मलाई लाग्यो कि कला, साहित्यको विकास विना भौतिक विकास अपूर्ण छ । अबको नीति तथा कार्यक्रम बनाउँदा नगरपालिकाले यो कुरालाई ख्याल गर्ने छ ।’

विभिन्न साँस्कृतिक कार्यक्रमसहित सुरु भएको कार्यक्रमले छुट्टै अर्थ राखेको नेपाल पत्रकार महासंघ सिन्धु शाखाका अध्यक्ष जीवन श्रेष्ठले बताए । ‘हामीले पत्रकारितामार्फत सामाजिक सचेतना त फैलाईरहेका छौं तर प्रेस सेन्टर सिन्धुपाल्चोकले गरेको यो कार्यले पत्रकारितासँगै पत्रकारहरुले सांस्कृतिक क्षेत्र, कला, साहित्यको पनि जगेर्ना गर्न सक्छ भन्ने पुष्टि गरेको छ’, उनले भने ।

उत्सव विभिन्न चरणमा साहित्यकार, बुद्धिजवि, सञ्चारकर्मी, स्थानीयको बाक्लो उपस्थिति रहेको थियो ।