जनप्रतिनिधिले झेल गरेको भन्दै कर्मचारीले गरे खेल बहिष्कार (विज्ञप्तिसहित)

चौतारा । चौतारामा जारी नगर स्तरिय मैत्रीपुर्ण महिला फुटबल प्रतियोगितामा महिला जनप्रतिधिहरुको समूहले नक्कली खेलाडी खेलमा सहभागी गराएको भन्दै कर्मचारी समूहले खेल बहिष्कार गर्ने चेतावनी दिएका छन् ।

नगर महिला सञ्जालको आयोजनामा आइतबार चौताराको मिनी रंगशालामा भएको खेलमा चौतारा साँगाचोेकगढी नगरपालिकाका जनप्रतिनिधि र नगरपालिकै कर्मचारीबीच भिडन्त भएको थियो । ३० मिनेटको निर्धारित समयमा दुबै पक्षबाट गोल हुन नसकेपछि खेल टाइब्रेकरमा गएको थियो ।

टाइब्रेकरमा २ गोलको विरुद्ध ३ गोल गर्दै जनप्रतिनिधि विजयी भएपछि कर्मचारीहरुले नक्कली जनप्रतिनिधि प्रतियोगितामा सहभागि गराइएको भन्दै आक्रोश जनाएका थिए । उनीहरुले जनप्रतिनिधिको समूहलाई कारबाही हुनुपर्ने माग राखे पनि कारबाही नहुने भएपछि सोमबार तृतीय स्थानका लागि हुने प्रतियोगिता आफूहरुद्वारा बहिष्कार गर्ने घोषणा गरेका हुन् ।

मैत्रीपूर्ण खेलमा गैर जनप्रतिनिधिहरु सहभागी गराइएको भन्दै उनीहरुले एक हस्तलिखित विज्ञप्तिमार्फत बाँकी खेल नखेल्ने घोषणा गरेका हुन् । १२ जना खेलाडिहरुद्वारा हस्ताक्षरित विज्ञप्तिमा खेल नियम अनुसार खेलाउन पनि सचेत गराइएको छ ।

तर चौतारा साँगाचोकगढी नगरपालिकाको उपप्रमुख सीता थापा भने जनप्रतिनिधिमा खेल्ने खेलाडी नभएकोले अरु राखेको बताउँछिन् । ‘यो कुरा खेलको सुरुवातमै थाहा थियो, खेल हारजीत भएपछि मात्रै थाहा भएको होईन’, उनले भनिन्– ‘शिक्षक र सहकारीको टीममा पनि त्यस्तो भएको छ ।’