स्थापना दिवसको अवसरमा स्वास्थ्य शिविर

खाडिचौर । सिन्धुपाल्चोकको बलेफी गाउँपालिका– ७ चिम्लिङमा रहेको सरस्वती माद्यामिक विद्यालयले आफ्नो ५१औं स्थापना दिवसको अवसरमा स्वास्थ्य शिविर गरेको छ ।

विद्यालयले वार्षिकोत्सव तथा अभिभावक भेला पारेर बुधबार स्वास्थ्य शिविर गरेको हो । बेलेफी वडा नम्बर ७ को आयोजना तथा लायन्स क्लब अफ रन्जाना सिस्टरको सहयोग तथा कांग्रेस नेता सुवास तिमल्सिनाको समन्वयमा स्वास्थ्य शिविर गरिएको वडा कार्यालयले जनाएको छ ।

स्वास्थ्य शिविरको सुभारम्भमा बोल्दै नेता तिमल्सिनाले हरेक रोगको उपचारको लागि गाउँघरमा शिविर राखिने बताए । ‘शिविरमा आएर सेवा लिन नगरिकलाई सहज हुने हुँदा यो कार्यक्रम गरिएको हो’, उनले भने– ‘स्थानीयलाई सुलभ रुपमा स्वास्थ्य सेवा दिनुनै हाम्रो मूख्य ध्येय हो ।’ शिविरमा कतिपय रोगको उपचार सम्भव नहुने हुँदा त्यस्ता समस्याका विरामीहरुलाई काठमाडौं लगेर उपचार गरिने समेत तिमल्सिनाले बताए ।

कार्यक्रममा बलेफी गाउँपालिकाकी उपाध्यक्ष सरु लामाले पहिला आफ्नो स्वास्थ्यको ख्याल गर्नुपर्ने बताउँदै यस्ता स्वास्थ्य शिविरले स्थानीयमा सेवा पुग्ने जनाईन् । बलेफी– ७ का वडा अध्यक्ष गृबिन्द्र चौलागाईंले चिम्लिङमा अहिलेसम्म स्वास्थ्य शिविर सञ्चालन नभएको अवस्थामा स्वास्थ्य शिविरबाट सुगर प्रेसरको बिरामी र पाठेघरको समस्या भएको महिलाहरुले सेवा लिन पाएको बताए । उनले आगामी वार्षिकोत्सवमा विद्यालयका सबै विद्यार्थीहरुलाई ट्रयाकसुट प्रदान गर्ने प्रतिबद्धतासमेत व्यक्त गरे ।

एक दिने स्वास्थ्य शिविर कार्यक्रममा ९० जनाले पाठेघर सम्बन्धि रोगको सेवा लिएको थिए । जसमध्ये २ जनालाई समस्या देखिएको लायन्स क्ल्व रन्जना सिस्टर्सले जानकारी दिएको छ । त्यस्तै १ सय १० जना भने सुगर प्रेसरको जाँच गराएका थिए ।

५१औं बार्षिक उत्सवको अवसरमा सरस्वती माध्यमिक विद्यालयलयको व्यवस्थापन समितिका अध्यक्ष नीरकुमार तामाङले आफ्ना बुवा जेठा तामाङको नाममा २५ हजारको अक्षयकोष स्थापना गर्ने प्रतिबद्धता व्यक्त गरेका छन् । विद्यालयको वार्षिकोत्वस तथा अभिभावक भेला केक काटेर मनाईएको थियो ।