एमालेलाई दियो वाईसियलले चुनौति

चौतारा । नेकपा (एमाले) सिन्धुपालचोकको दशौँ जिल्ला अधिवेशनमा प्रस्तुत गरिएको प्रतिवेदनप्रति ईंकित गर्दै वाईसियल सिन्धुपाल्चोकको एमालेलाई चुनौति दिएको छ ।

वाईसियल सिन्धुपाल्चोकका संयोजक सुमित काफ्लेले सम्मेलन स्थगित गरेर टुँडिखेल आई मुलुकको समग्र परिवर्तनमा राजनीतिक दलहरुको त्याग, तपस्या, बलिदानी र भुमिकाको बहस गर्न चेतावनी दिएका हुन् ।
‘कमरेड कमल नेपाल र सिन्धु एमाले, शब्दकोष नै रित्तिने गरी अरुलाई गाली गर्दा तपाईंका कार्यकताको ताली ठोके होलान् । तपाईंको आत्मामा एकैछिन न्यानो मिल्यो होला’, काफ्लेले सामाजिक सञ्जालमार्फत भनेका छन्– ‘हिम्मत छ, सम्मेलन स्थगित गरेर टुडिखेल आउनोस् ! मुलुकको समग्र परिवर्तनमा राजनीतिक दलहरुको त्याग, तपस्या, बलिदानी र भुमिकाको बहस गरौ !’

त्यस्तै वाईसिएलका केन्द्रिय सदस्य दीपक न्यौपानेले सयौं सिन्धुवासी आमा अनि हजारौं देशभरका महान आमाहरुका सपुत सन्तानको बलिदानीले प्राप्त गणतन्त्रको सुन्दर पक्षको प्रतिनिधित्व गरिसक्नु भएको कमरेड कमल नेपालको यी घृणित अनि निन्दनीय तर्कको हिसाव सिन्धु माओवादीले राम्रैसँग राख्ने लेखेका छन् ।

एमालेले दशौँ जिल्ला अधिवेशनमा जारी गरेको प्रतिवेदनमा नेकपा माओवादी (केन्द्र) लाई ‘अवसरवाद, अराजकता, अपारदर्शिता, अदूरदर्शिता, अस्थिरता र एजेण्डाविहिनताका कारण माओवादी पार्टी कमजोर मात्र हैन, यसको आकारपनि क्रमशः खुम्चिदै गएको छ । २०७४ मा नेकपा (एमाले)को सहयोगले तेस्रो हुन सफल भएको यो दल २०७९ मा नेपाली काँग्रेससँगको गठबन्धनका कारणले मात्रै केही स्थानमा विजयी हासिल गर्न सकेको थियो । २०७९ मा सम्पन्न स्थानीय तहको निर्वाचनमा १२ पालिका मध्ये ४ वटामा प्रमुख मात्रै र केही वडामा निर्वाचन जित्न सफल भएको थियो । संघ र प्रदेशको निर्वाचनमा नेपाली काँग्रेस र नेकपा (एस) को सहयोगमा संघमा एक र प्रदेशमा दुई सिट जित्न सफल भएको छ । यो पार्टीले २०५२ सालमा सुरु गरेको सशस्त्र हिंसात्मक आन्दोलनको जगमा प्राप्त राजनीतिक शक्तिका रुपमा जसरी उदायो, त्यसरी नै विघटनको दिशातर्फ उन्मुख छ’ भनि लेखेको थियो ।

प्रतिवेदनमा माओवादीबारे भ्रम फैलाएको भन्दै माओवादी नेता कार्यकर्ताले सामाजिक सञ्जालमा एमालेप्रति रोष प्रकट गरिरहेका छन् । ‘समाजलाई गति दिने स्पष्ट बैचारिक तथा राजनैतिक दृष्टिकोण खड्किएको, समपार्टीहरुलाई कटु कटाक्ष गरिएको र प्रतिबेदन आफैंमा अलमलिएको’ भन्दै अखिल (क्रान्तिकारी) का केन्द्रिय सदस्य मिलन लामाले टिप्पणी गरेका छन् ।