विद्यार्थीलाई कविता लेखन सीप प्रदान

चौतारा । ‘अन्तिम शुक्रबार, फरक शुक्रबार’ भन्ने उद्देश्यका साथ विद्यार्थीहरुलाई रचनात्मक सीप प्रदान गर्ने उद्देश्यले चौतारा साँगाचोगढी नगरपालिका– ९ जितपूरमा रहेको गोल्मादेवी माद्यमिक विद्यालयले शुक्रबार कविता लेखन कार्यशाला सञ्चालन गरेको छ ।

कार्यशालालाई प्रगतिशील लेखक संघ बागमती प्रदेश सचिव एवम् राष्ट्रिय कविता प्रतियोगिता– २०८० का गोलमेडलिष्ट कवि सुन्दर शिरीषले सहजिकरण गरेका थिए । कक्षा ८ देखि १० सम्मका विद्यार्थी सहभागि कार्यशालामा शिरीषले कविताको सैद्धान्तिक पक्षको चर्चा गर्दै कवितामा समावेश हुने विम्ब, प्रतिक, मिथक, सौन्दर्य र लयबोधको बारे जानकारी दिएका थिए ।

कार्यशालामा दश मिनेट समय दिएर विद्यार्थीलाई कविता लेख्न लगाईएको थियो । ‘हामीले आजको कार्यशालाबाट कविता लेखनबारे धेरै ज्ञान प्राप्त ग¥यौं’, कार्यशालामा सक्रिय सहभागि भई ‘मेरा गुरुबा–आमा’ शीर्षकको कविता प्रस्तुत गरेकी कक्षा १० को छात्रा रिकिषा भुजेलले भनिन्– ‘हामीले कविता लेख्न जानेका थिएनौं, छोटो समयमै पनि उहाँको प्रशिक्षणबाट राम्रो कविता लेख्न सक्छौं भन्ने आत्मविश्वास बढेको छ ।’

कार्यशालामा सहभागि सबै विद्यार्थीहरुले एक–एकवटा कविता लेखेर सुनाएका थिए । विद्यार्थीहरुले कार्यशालामा प्रस्तुत गरेका कवितामाथी कवि सुन्दर शिरीषले सुझावसहितको टिप्पणी गरेका थिए । ‘विद्यालयले बालबालिकालाई कविता लेखन र वाचन बारे प्रशिक्षणको व्यवस्था गरेर उनीहरूभित्र लुकेर रहेको अन्तर्निहित क्षमता प्रस्फुटन गराउने अवसर दिएको छ’, शिरीषले प्रतिक्रिया दिए ।

विद्यालयको नेपाली विषय समन्वय समितिको आयोजना र अतिरिक्त क्रियाकलाप सञ्चालन समितिको समन्वयमा भएको कार्यशालामा विद्यालयका प्रधानाध्यापक ज्ञानबहादुर तामाङले हरेक महिनाको अन्तिम शुक्रबार विद्यार्थीहरुलाई अतिरिक्त सीप प्रदान गर्ने उद्देश्य अनुरुप कविता लेख्ने तौर तरिका सिकाउन कार्यशाला सञ्चालन गरेको बताए । कार्यशालाको सञ्चालन शिक्षक सुनिल तामाङले गरेका थिए ।