विपद् अध्ययन गर्दै मन्त्री दाहाल सिन्धुपाल्चोकमा

खाडिचौर । संघीय सरकारको भौतिक योजना तथा यातायात मन्त्री देवेन्द्र दाहालसहितको टोलीले सिन्धुपाल्चोकमा भएका विपद् तथा विकासका कामको अवस्थाको अवलोकन गरेका छन् ।

सिन्धुपाल्चोकको खाडीचौर, जुरे, बाह्रविसे, सुनकोशी, खागदल, ब्वाँसेरीलगायतका स्थानमा विपद्को क्षतिको निरीक्षण गरिएको हो । विपद्ले पुर्याएको क्षतिको निरीक्षण, विकास आयोजनाको अनुगमन तथा विकास आयोजनाको आवश्यकताबारे मन्त्री दाहालले जानकारी समेत लिएका छन् । अनुगमनको क्रममा खाडीचौरमा बषौदेखि निर्माणाधीन अवस्थामा अलपत्र रहेको पक्की पुल र बाह्रबिसे–त्रिपुरासुन्दरी जोड्ने सुनकोशी नदी पुलको अवलोकन गर्दै तत्काल बाँकी काम अगाडि बढाउन निर्देशन दिए ।

सडक विभागका महानिर्देशक समेतको निरीक्षण टोलीले दुबै पुलको बाँकी काम तत्काल सम्पन्न गर्नेगरी आवश्यक प्रक्रिया सुरु हुने प्रतिबद्धता जनाएका छन् । गत असारमा आएको बाढीले बगाएको खागदल खोलाको अवस्था समेत सो टोलीले निरीक्षण गरेको छ । नेपाल चीन बीचको मूख्य ब्यापारिक नाकासम्मको अरनिको राजमार्गमा दुई साता भित्रै वेलिब्रिज निर्माण सम्पन्न हुनेगरी काम अगाडी बढाउन मन्त्रीले निर्देशन दिए ।

बाह्रविसे–पिस्कर सडक, बाह्रविसे–बुधेपा–घोर्थली सडक स्तरोन्नती, बाह्रविसे वडा नम्बर ६ र ७ जोड्ने ब्वाँसेरी मोटरेवल पुल, जुरे क्षेत्रको सडको दिगो समाधान लगायतका विषयमा स्थानीय, जनप्रतिनिधि तथा राजनीतिक दलका नेतृत्वले मन्त्री तथा सडक विभाग समक्ष ध्यानाकर्षण गराएका छन् । ती स्थानका अवस्थाको जानकारी लिदै मन्त्री दाहालले सिन्धुपाल्चोकका विकास आयोजनाका समस्या तत्काल समाधान गर्न आफूहरु लाग्ने प्रतिबद्धता जाहेर गरे ।

विपद्को अवलोकन तथा विकास आयोजनाको अनुगमन पश्चात सुनकोशी गाउँपालिकाले आयोजना गरेको स्वागत कार्यक्रममा मन्त्री दाहालले भर्खरै निर्माण भएको सरकार स्थायीत्वको लागि निर्माण भएको र विकास र समृद्धिका लागि केन्द्रीत हुने बताए । ‘मन्त्रीले विकासको जानकारी लिनै नपाई सरकार परिवर्तन हुने परिपाटीले पनि विकास आयोजनाहरु प्रभावित हुन पुगेका हुन्, अब विकासले गति लिन्छ,’ मन्त्री दाहालले भने– ‘सरकारले स्थिरता दिन्छ, उत्पादन, रोजगारीसहितको समृद्धिको बाटोमा रहेका स्थानीय सरकारका कार्यक्रममा सहकार्य रहनेछ ।’

मन्त्री समक्ष सुनकोशी गाउँपालिकाका अध्यक्ष टपिन्द्रप्रसाद तिमल्सिनाले स्थानीय सरकारले सञ्चालन गर्न नसकेका उद्यम विकास तथा विकास आयोजनाहरु सञ्चालनमा केन्द्र सरकारको सहयोगको अपेक्षा समेत राखेका थिए ।

विपद्प्रस्त जिल्लाको रुपमा रहेको सिन्धुपाल्चोकमा यो वर्षको वर्षातले थप क्षति पुर्याएपछि मन्त्रीसहितको सरोकारवालाहरुलाई जिल्लाको अवलोकनको लागि अनुरोध गरिएकोले मन्त्रीको अवलोकन कार्यक्रम तय भएको नेकपा एमाले केन्द्रीय कमिटी सदस्य सरेश नेपालले जानकारी दिए । नेता नेपाल, जिल्ला अध्यक्ष होमनारायण श्रेष्ठ, प्रदेश कमिटी सदस्य अशोक चौलागाईसहितले समग्र अवस्थाबारे दाहाललाई जानकारी गराएका थिए ।