मेलम्चीको पानी पुग्याे सुन्दरीजल

काठमाडौँ । बहुप्रतीक्षित मेलम्ची खानेपानीको साढे २६ किलोमिटर सुरुङमा भरिएको पानी सुन्दरी जल आइपुगेको छ । शनिबार काठमाडौंको सुन्दरीजलमा आयोजित विशेष कार्यक्रममा प्रधानमन्त्री केपी शर्मा ओलीले स्विच थिचेर सुन्दरीजलमा पानी खसालिएको हो ।

खानेपानी मन्त्रालय र मेलम्ची खानेपानी विकास समितिले आवश्यक सम्पूर्ण प्राविधिक काम पूरा गरेर सुरुङमा पानी परीक्षण गरेको थियो ।कार्यक्रममा प्रधानमन्त्री ओलीले केही दिनभित्रै काठमाडौँवासीका घर घरका धारामा मेलम्चीको पानी झर्ने बताए । लामो समयदेखि जारी वाग्मती सफाइ अभियानमा पनि मेलम्चीको पानीले सहयोग पुग्ने प्रधानमन्त्री ओलीको विश्वास थियो ।

पहिलो चरणमा काठमाडौँमा १५ हजार घरधुरीमा टेस्ट भइसकेको भन्दै प्रधानमन्त्री ओलीले दोस्रो चरणमा यांग्री र लार्केबाट पानी थपेपछि काठमाडौँलाई खानेपानी पुग्ने बताए । सुन्दरीजलमा पानी आउनु नयाँ उचाइको सफलता भएको भन्दै ओलीले काठमाडौंवासीलाई बधाई तथा शुभकामना पनि दिएका छन् । त्यस्तै प्रधानमन्त्री ओलीले सरकारले लोकप्रिय काम गर्न थालेपछि आफ्नै पार्टीका साथीहरूले प्रधानमन्त्रीबाट हटाउन लागेको आरोप लगाए । २३ सिट जितेको कांग्रेससँग प्रधानमन्त्री बन्दिनुपर्‍यो भनेर एक हल बुढानीलकण्ठतिर लागेको उनको भनाइ छ ।

गत असारमै सुरुङमा पानी भनेर परीक्षण गरिएको थियो तर हेलम्बु गाउँपालिका–१ स्थित अम्बाथानको अडिटको मुख्य गेट (नं १७) फुटेर निस्केको पानीले आयोजनाका एक इन्जिनियर र चालकलाई बगाएको थियो । त्यसपछि आयोजनाको मुख्य दातृ निकाय एसियाली विकास बैङ्क (एडिबी) को अनुदान सहयोगअन्तर्गत चार जना विशेषज्ञको टोलीले सुरुङ, मुहान स्थल, गेटलगायत संरचनाको पुनः जाँच गरेको थियो । गत फागुन १० गते सिन्धुपाल्चोकको मेलम्ची खोलादेखि काठमाडौँको सुन्दरीजलसम्मको साढे २६ किलोमिटर सुरुङमा पानी पठाइएको थियो । सुन्दरीजलमा आएको पानीलाई प्रशोधन गरेर परीक्षण गरिनेछ । वैशाखको दोस्रो सातादेखि घरघरमा पानी वितरण हुने बताइएको छ । निर्माण सुरु भएको १२ वर्षपछि मेलम्चीको सुरुङबाट ल्याइएको पानी सुन्दरीजलमा आइपुगेको हो ।