नेकपा (एमाले) का साथीहरूका नाममा

हुन त आजका मितिमा सर्वोच्च अदालतले तोकिदिए अनुसार कानुनी रुपमा म तपाईंहरु भन्दा अलग विचारधाराको मान्छे यद्यपि २३ गते अघि र त्यसपछि आजसम्म मेरो शरीरमा कुनै फरक धातुको विकास भएको छैन । विगतमा करिब १५ वर्ष तपाईंको पार्टीका नेताहरूको पछि अलि अलि लुखुर लुखुर हिँडेको याद र प्रचण्ड ओली कमरेड मिलेर मेरा एकदुई वटा खुद्रा मसिना पदहरु गायब पारेपछि पनि साथीहरूको लहैलहैमा बेला बेलामा संगसंगै हिडेको नाताले मनमा पलाएका केही भावहरु विसाउने प्रयास गरेको छु । अर्कोको घरभित्र किन छिरेको नभन्नु होलाः

सर्वप्रथम त कमरेड बादल लगायतका नेताहरू एमाले मै बसिदिए म खुशी हुने थिएँ किनकि सामाजिक सञ्जालमा हामी जस्ता सोझा साझा मनुवालाई तपाईंहरुले लगाउने आतंककारीको ट्याग हट्ने थियोे जनयुद्धको सैन्य प्रमुख नै उतै भएपछि ।

पार्टी गणतन्त्रमा जाने कि नजाने दोधारमै रहेको अवस्थामा समेत गणतन्त्रका लागि धरधरी रगत बगाउने गगन, रामकुमारी जस्ता योद्दाहरुलाई जुनसुकै पार्टीका भए पनि हामीले सम्मान गर्नसक्नुपर्छ ।

सामाजिक सञ्जालमा अबको दिनमा माधव नेपाल, भिम रावल, योगेश भट्टराई, गोकर्ण विष्ट, रामकुमारी झाँक्री, सुरेन्द्र पाण्डे, राजेन्द्र पाण्डे, घनश्याम भुषाल लगायतका नेतृत्व बिनाको एमालेको जुन परिकल्पना तपाईंहरु गरिरहनु भएको छ त्यो देख्दा लाग्छ नेपाली कम्युनिष्ट राजनीतिको बलियो शक्तिको रुपमा रहेको एउटा पार्टी पतनको दिशामा जाँदैछ । मदन भण्डारीको हत्या पछि र दशवर्षे जनयुद्धको समयमा समेत एमाले भन्ने जातको बीउ जोगाएर, माओवादी आन्दोलनलाई शान्तिपूर्ण बाटोमा ल्याउन अथक योगदान गर्ने मध्येका एक पात्र उनै माधव नेपाल हुन् । पार्टी गणतन्त्रमा जाने कि नजाने दोधारमै रहेको अवस्थामा समेत गणतन्त्रका लागि धरधरी रगत बगाउने गगन, रामकुमारी जस्ता योद्दाहरुलाई जुनसुकै पार्टीका भए पनि हामीले सम्मान गर्नसक्नुपर्छ । कमरेड विद्या भण्डारीको त्यो गरिमामय स्थान जनयुद्धका योद्धाहरु, गगन, गुरुराज र रामकुमारी जस्तै युवाको रगतले पोतिएको छ ।

सिन्धुपाल्चोककै सवालमा भन्नुपर्दा अमृत सुवास, झम्क, डम्बर, कमल, अरुण, भगवती, जगन्नाथ लगायत सदैब सतिसालझै नडगमगाउने नेतृत्व बिनाको एमाले कस्तो होला ? के उल्लेखित नेतृत्वको खाडल शेरबहादुर, दावाहरुले पुर्न सक्लान् ? इतिहास त हेर्नुभएकै होला । यसको अर्थ सरेश, हस्त पण्डित, बालकृष्ण देउजा, होमनारायणलाई कमजोर र योगदान नगरेका नेता भन्न खोजिएको होइन । एउटा सिंगो गाडी त सानातिना नटबोल्टुको भर हुन्छ भने इन्जिन नै टुक्रिएर जाँदा कस्तो होला अवस्था ?

होला राजनीतिमा कमजोर पक्षलाई अति नै पेलान हुन्छ र त्यसको पीडा कहिँ कतै बिझेको पनि हुन सक्छ तर साँच्चै आन्दोलन बचाउने हो भने सम्झौता पनि गर्नुपर्ने हुनसक्छ । र एउटा कुरा हिजो पार्टी छोडेर हिडेका भन्ने आरोप जुन लगाइरहनु भएको छ त्यो शब्दावली नै गलत छ । हिजो पार्टी छोडाउने को हो ? उनै केपी बा होइनन् ? लुसुक्क कसैलाई थाहै नदिई पार्टी भंग गर्ने ! र, भन्नै पर्छ अदालतको एउटा प्राविधिक विषयले आज कमरेड केपी वा जबर्जस्त बलियो देखिएका छन् तर भोली इतिहासमा एकीकृत भईसकेको कम्युनिष्ट आन्दोलन धुजा धुजा पारेको अपजस उनलाई नै जाने पक्का छ ।

समग्रमा मेरो आशय विपक्षीसँग त स्वस्थ बहस र सामाजिक मुद्दामासँगै हिँड्नु पर्ने बेलामा आफ्नै बीचको यो वैमनश्यताले घाटा अरु कसैलाई होइन तपाईं स्वयंलाई हुने हो ।

(लेखक सञ्चारकर्मी हुन् ।)