मापदण्ड नपुगेको भन्दै स्वास्थ्य चौकीको पर्खाल भत्काइयो

मेलम्ची  । मेलम्ची नगरपालिका वडा नम्बर १२ को बाँसबारी स्वास्थ्य चौकीमा लगाइएको पर्खाल मापदण्ड नपुगेको भन्दै अनुगमन टोलीले भत्काइदिएको छ ।

जिल्ला समन्वय समिति, जिल्ला आयोजना कार्यान्वयन इकाई भवन, वडा कार्यालय र ट्रान्सपरेन्सी इन्टरनेस्नल नेपालबाट गएको प्राविधिकसहितको अनुगमन टोलीले पर्खालमा हुनुपर्ने मापदण्ड नभएको भन्दै भत्काएको मेलम्ची १२ का वडा अध्यक्ष रामबहादुर लामाले जानकारी दिए । २ करोड ९४ लाख ६९ हजार ३ सय रुपैंया लागतमा बन्न लागेको स्वास्थ्य चौकीको भवन २०१९ को जुलाई १५ बाट सुरु भएको थियो । २०२० को अक्टोबर १४ सम्म हस्तान्तरण गरिसक्न पर्ने भएतापनि अहिले सम्मपनि सो स्वास्थ्य चौकी हस्तान्तरण भएको छैन ।

राष्ट्रिय पुनर्निमाण प्राधिकरण जिल्ला आयोजना कार्यान्वयन इकाई भवन चौताराको सहयोगमा स्वास्थ्य चौकीको भवन निमार्ण भइरहेको छ । अवलोकन तथा मापनका क्रममा जिल्ला समन्वय समिति सिन्धुपाल्चोक र ट्रान्सपरेन्सी इन्टरनेशनल नेपालले बाँसबारी स्वास्थ्य चौकीमा लगाइएको पर्खालको अवलोकन गरेको थियो ।

अवलोकन तथा मापनका क्रममा जिल्ला समन्वय समिति अनुगमनमा जाँदा ठेकेदारको लार्पबाहिकै कारण कमजोर पर्खाल लगाएको पाइएकाले तुरुन्त संरचना भत्काउन लगाइएको जिल्ला समन्वय समिति सिन्धुपाल्चोकका उपप्रमुख बालकुमारी सापकोटाले बताईन् । ‘म आफै पनि अवलोकनमा गएको थिएँ, अवलोकनमा जाँदा मापदण्ड अनुसार काम गरेको नपाइएपछि भत्काउन लगाएको हुँ,’ सापकोटाले भनिन् ।

एउटै कामदार नपाएको र फरक फरक कामदार लगाउन परेका कारणले पर्खालमा केहि समस्या आएको ठेकेदारले स्वीकार गरेको छ । लगाइएको पर्खाल मापदण्ड विपरित पाइएपछि वडा अध्यक्ष, प्राविधिक, ठेकेदार लगायतलाई ट्रान्सपरेन्सी इन्टरनेशन नेपाल सिन्धुपाल्चोकले ध्यानाकर्षण गराएको थियो । सो पश्चात् ठेकेदारले तुरुन्तै मापदण्ड विपरित रहेको पर्खाल भत्काएर पुनः लगाउने बताएको थियो ।

स्वास्थ्य चौकी निमार्ण भइरहँदा त्यसको रेखदेखको लागि खटाइएको प्राविधिकले किन नहेरेको भन्ने प्रश्नमा जिल्ला आयोजना कार्यान्वयन इकाई भवनका प्रमुख सन्तोष निरौंलाले प्राविधिकहरुले धेरै साइड हेर्नुपर्ने र प्राविधिकको आँखा छलेर कामदारले लार्पबाही गरेको हुनाले यस्तो भएको बताए । ‘प्राविधिकहरु सिमित हुन्छन् एउटै ब्यक्तिले धरै साइट हेर्नुपर्ने हुन्छ, दिनकै साइटमा जान पनि भ्याइदैन । प्राविधिक टोली नभएको बेला कामदारले आफू अनुकुल काम गर्छन त्यसैले समस्या भएको हो’, निरौलाले भने ।

इन्जिनियर प्रकाश कार्कीले पर्खाल लगाउदा ‘जोइन’ नमिलेको कारणले भत्काउन लगाइएको जानकारी दिए । ट्रान्सपरेन्सी इन्टरनेशन नेपालसँगै गएको अनुगमन टोलीलाई इन्जिनियर कार्कीले ठेकेदारले वेवास्ता गरेको कारण लगाइसकेको पर्खाल भत्काउन परेको बताए ।

मेलम्ची नगरपालिका वडा नम्बर १२ का वडा अध्यक्ष रामबहादुर लामाले बेलैमा अनुगमनमा आई स्वास्थ्य चौकी तथा पर्खाल निमार्णमा भएको कमजोरी पत्ता लगाई सुधार गर्ने मौका पाएको भन्दै ट्रान्सपरेन्सी इन्टरनेशनल नेपाललाई धन्यवाद दिए । उनले आगामी दिनमा पनि यी र यस्ता कमिकमजोरी देखाइ सहयोग गरिदिन आग्रह समेत गरे ।

भूकम्पपछि सिन्धुपाल्चोकको स्वास्थ्य चौकी पुननिमार्णको अवस्था नाजुक देखिएको छ । भूकम्पले भत्काएको स्वास्थ्य चौकीको भूकम्प गएको यतिका वर्ष बितिसक्दापनि सम्बन्धित निकायले खासै चासो नदिदा पुर्ननिमार्णले गति लिन नसकेको हो । अहिले जिल्लामा २२ वटा स्वास्थ्य केन्द्रको जग्गा तय भएर टेण्डर प्रक्रिया अगाडि बढाइएको छ भने २ वटा स्वास्थ्य चौकी निमार्णको चरणमा छन् । स्वास्थ्य चौकीको भत्किएको लामो समयसम्म पनि पुननिमार्ण नहुँदा नागरिकहरुले गुणस्तरिय स्वास्थ्य सेवा पाइराखेका छैनन् । अस्थायी भवनबाटै स्वास्थ्य उपचार गराइरहदा अहिले कोरोनाको बेलामा स्वास्थ्य मापदण्ड लागु गर्न समेत समस्या भइरहेको कतिपय स्वास्थ्यकर्मीहरुको गुनासो छ ।