सिन्धुमा को–को भए नेपाल स्काउटको संयोजक

चौतारा । नेपाल स्काउटले देशभरका ७ सय ५३ वटै पालिकामा स्काउट संरचना निर्माण गरेको छ । सो अनुसार सिन्धुपाल्चोकको १२ वटै पालिकामा स्काउटको संयोजक बनाईएको छ ।

जस अनुसार चौतारा साँगाचोकगढी नगरपालिकामा रविन पुरी, बाह्रविसे नगरपालिकामा मौसमी गुरुङ, मेलम्ची नगरपालिकामा उमा प्रधान, इन्द्रावती गाउँपालिकामा भुगोलनाथ आचार्य, जुगल गाउँपालिकामा फुलकाजी स्याङ्वोलाई संयोजक तोकिएको छ । त्यस्तै पाँचपोखरी थाङ्पाल गाउँपालिकामा शेरबहादुर तामाङ, बलेफी गाउँपालिकामा रेणुका पराजुली, भोटेकोशी गाउँपालिकामा अजय गुरुङ, सुनकोशी गाउँपालिकामा बिन्दा माझी, हेलम्बु गाउँपालिकामा कृष्णचन्द्र श्रेष्ठ र त्रिपुरासुन्दरी गाउँपालिकामा प्रतिमान श्रेष्ठलाई संयोजकको जिम्मेवारी दिईएको छ ।

स्काउटका राष्ट्रिय संयोजक लोकबहादुर भण्डारीका अनुसार २००९ सालमा गठित स्काउट विगतमा सिमित क्षेत्रमा क्रियाशील भए पनि देशैभरी सक्रिय बनाउने उद्देश्यले सबै पालिकामा विस्तार गरिएको जानकारी दिए । परम्परागत संरचनामा खुम्चिएर रहेको स्काउटले नयाँ संरचनासँगै समयको मागअनुसार गतिशील हुने अवसर पाएको उनको भनाइ छ ।

स्थानीय संरचना अन्तर्गत हरेक विद्यालयमा कम्तीमा एक स्काउट समिति बन्नेछ । ती समितिमार्फत विद्यार्थीले अनुशासन, कुलतबाट बच्ने उपाय, सामाजिक कार्यमा सक्रियता एवं शारीरिक तथा मानसिक विकाससम्बन्धी तालिम प्राप्त गर्नेछन् । स्काउटको इतिहासमा यस आर्थिक वर्षमात्र ५० हजार बढी स्काउट स्वयंसेवक परिचालन गरिएको र कोभिडको महामारीमा शव व्यवस्थापनसम्मका सामाजिक कार्यमा सक्रिय रहेको संयोजक भण्डारीले जानकारी दिए ।

नेपाल स्काउट ऐन २०५५ अनुसार प्रधानमन्त्री नेपाल स्काउटका संरक्षक र युवा तथा खेलकुदमन्त्री प्रमुख स्काउट हुने व्यवस्था रहेको छ । प्रदेशमा मुख्यमन्त्री संरक्षक सामाजिक विकासमन्त्री प्रमुख स्काउट हुने व्यवस्था छ । स्थानीय पालिकामा, पालिका प्रमुख संरक्षक तथा पालिका उपप्रमुख प्रमुख स्काउट हुने व्यवस्था छ । यसबाट सङ्घ, प्रदेश र स्थानीय सरकारको सहयोगमा नीतिगत रुपमै हरेक विद्यालयमा स्काउट युनिटहरू सञ्चालन गर्ने स्काउटको योजना छ ।