संक्रमित बढेको बढ्यै, बल्ल आइसोलेशनको तयारी

चौतारा । कोरोना महामारी तीव्र गतिमा विस्तार भएसँगै त्यसको न्यूनिकरणको लागि पहल नहुँदा महामारीविरुद्धको लडाईं कठीन देखिएको छ ।

स्वास्थ्य कार्यालय सिन्धुपाल्चोकको पछिल्लो तथ्याङ्क अनुसार जिल्लामा दोस्रो चरणको कोभिड– १९ बाट १ सय ११ जना संक्रमित भएका छन् । संक्रमण बढेपनि स्थानीय सरकारले आवश्यक पहल नगरेका कारण झन् संक्रमित बढ्दै गएका छन् । पछिल्लो चरण मात्रै जिल्लाका केहि पालिकाहरुले आइसोलेशन वार्ड निर्माणको सुरुवात गरेका छन् ।

जुगल गाउँपालिका र बलेफी गाउँपालिकाले संयुक्त रुपमा आईसोलेशन वार्ड बनाउने तयारी गरेका छन् । रत्नराज्य मावी चनौटेमा २० शैयाको अस्थाई उपचार केन्द्र निर्माण गर्ने जनाईएको छ । सोमबार बलेफी गाउँपालिकाको कार्यलयमा बसेको गाउँपालिका अध्यक्ष स्तरीय संयुक्त बैठकले बढ्दो कोरोना संक्रमणलाई मध्यनजर गर्दै २० शैयाको अक्सिजनसहितको अस्थायी आइसोलेशन, ५० शैयाको सामान्य आईसोलेशन केन्द्र रत्नराज्य माध्यामिक विद्यालयको आवासीय भवन चनौटेमा सञ्चलान गर्ने निर्णय गरेको बलेफी गाउँपालिका अध्यक्ष केदार क्षेत्रीले जानकारी दिए । बैठकले सामुहिक क्वारेन्टाइन सञ्चालन नगर्ने, बाहिरवाट आएका र सम्भावित संक्रमितहरुलाई स्वास्थ्य मापदण्ड पालना गरेर कडाईका साथ होम क्वारेन्टाइनमा बस्न सुचित गर्ने निर्णय गरेको जुगल गाउँ पालिकाको अध्यक्ष होमनारायण श्रेष्ठले जानकारी दिए ।

त्यस्तै जिल्ला समन्वय समितिको पुरानो भवनमा ९ वेडको आइसोलेशन वार्ड सञ्चालनमा ल्याउने गरी तयार गरिएको छ । सो आइसोलेशन वार्डमा अक्सिजन सहितको व्यवस्था हुने भएको छ । सिन्धुपाल्चोकको चौतारामा २६ वेडको आइसोलेशन वार्ड तयार भईसकेको छ । चौतारा साँगाचोकगढी नगरपालिकाले फिल्ड ट्रेनिङ सेन्टर रहेको भवनमा १२ वेडको आइसोलेशन र चौतारा अस्पतालमा ५ वेडको आइसोलेशन वार्ड यस अघिनै तयार गरिसकेको चौतारा साँगाचोकगढी नगरपालिका प्रमुख अमानसिं तामाङले जानकारी दिए ।

जिल्लाको अन्य पालिकामा पनि आइसोलेशन कक्षको तयारी गरिदै छ । कम्तीमा पनि सिन्धुपाल्चोकका साविकको तिनै क्षेत्रमा रहेका अस्पतालमा केही संख्यामा भएपनि सबै सुविधा भएको आइसीयु बेड स्थापना गर्न नागरिक समाजले अनुरोध गरेको छ । भेन्टीलेटरको सुविधा भएमा विरामिले बाटोमै ज्यान गुमाउने सम्भावना कम हुने उनीहरुको भनाई छ ।