अन्तरजातिय विवाह गर्ने जोडीलाई सम्मान

साँगाचोक । अन्तरजातीय विवाह गर्ने २ जोडीलाई नगद सहित सम्मान गरिएको छ । बुधबार चौतारा साँगाचोकगढी नगरपालिकाले साँगाचोकमा भएको एक कार्यक्रमबीच उनीहरुलाई सम्मान गरेको हो ।

अन्तरजातीय विवाह गरेका चौतारा साँगाचोकगढी नगरपालिका– ९ का युनिक विक पोखरेल र राधिका गिरी, वडा नं. ५ का कृष्ण विक र सर्मिला नेपालीलाई नगद ५/५ हजारसहित सम्मान गरिएको हो । नगर प्रमुख अमानसिं तामाङले अन्तरजातिय विवाह गर्ने दुई दम्पतीलाई नगदसहित सम्मानपत्रले सम्मानित गरेका हुन् ।

नगर स्तरीय दलित समन्वय समितिको आयोजना एवम् नगरपालिकाको सहयोगमा जुगल क्याम्पसमा आयोजना गरिएको दलित, गैह्र दलित अन्तरघुलन तथा दलित सहिद परिवार सम्मान कार्यक्रममा अन्तरजातीय विवाह गर्ने जोडीसहित दलित समुदायबाट सहिद हुने गोरेबहादुर पुर्कोटी, मोहन विक र निरबहादुर विकको परिवारलाई ५/५ हजार सहित सम्मान गरिएको थियो ।

नगर प्रमुख तामाङको प्रमुख आतिथ्यता तथा नगर उपप्रमुख जानुका पराजुलीको बिशेष आतिथ्यतामा गरिएको कार्यक्रममा बोल्दै नगर प्रमुख तामाङले जातिय विभेद सामाजिक अपराध रहेको र यसले सिङ्गो मानव सभ्यतालाई कलंकित बनाएको बताए । दलित समुदायको आर्थिक सामाजिक शैक्षिक अवस्थालाई उत्थान गर्न नगरपालिकाले विशेष प्राथमिकताको आधारमा कार्य गर्दै आएको बताउँदै तामाङले समाजबाट जातिय विभेद हटाउन सबै अगुवाहरु एकजुट हुनुपर्नेमा जोड दिए ।

छुवाछुत मुक्त नगर घोषण भईसकेको स्मरण गर्दै तामाङले विभेद, छुवाछूतजन्य व्यवहार गर्ने जो कसैलाई कडा सजाँय हुनुपर्ने धारणा राख्दै आफू सदैव उत्पीडित समुदायको पक्षमा रहेको बताए । कार्यक्रममा माओवादी केन्द्रका युवा नेता गणेश बिक, सागर परियार, ललित श्रेष्ठ, हरि बिक लगाएतको उपस्थित रहेको थियो ।