मिस्टर एण्ड मिस सिन्धुपाल्चोक हुने

चौतारा । परफेक्ट प्लान इन्टरटेनमेन्टले मिस्टर एण्ड मिस सिन्धुपाल्चोक गर्ने भएको छ ।

जिल्लामा लुकेर रहेको र नयाँ प्रतिभाको पहिचान गरि कलाकारहरु उत्पादन गर्ने उद्देश्यले मिस्टर एण्ड मिस सिन्धुपाल्चोक गरिन लागिएको हो । प्रतियोगितामा जिल्लाभरका १५ वर्ष माथि र २४ वर्ष नकटेकाहरुले आवेदन फारम भरी सहभागी हुन पाउने छन् ।

‘आवेदन फारम भर्नका लागि ५ सय रुपैंया शुल्क तोकिएको छ’, कम्पनीका कार्यकारी निर्देशक मन्जरी पुरीले भनिन्– ‘अडिसनमा छनौट नभएको खण्डमा सहभागीहरुले फारम भर्दा तिरेको शुल्क फिर्ता हुने छ ।’ उनका अनुसार अडिसनमा सेलेक्ट भएकाहरुले तालिमका लागि थप १२ हजार रुपैंया तिर्नुपर्ने छ ।

मिस्टर एण्ड मिस सिन्धुपाल्चोकको अडिसन भदौ १२, १९ र २६ गते हुने छ भने फिनाले असोज १६ गते तय गरिएको छ । आईतबार चौतारामा कार्यक्रमको जानकारीको लागि गरिएको पत्रकार सम्मेलनमा नायक सलोन बस्नेतले जिल्लामै पहिलोपटक हुन लागेको कार्यक्रममा सबैको साथ र सहयोगको अपेक्षा रहेको बताए । ‘कार्यक्रमको जानकारीको लागि मिडियाको भूमिका महत्वपूर्ण छ’, उनले भने– ‘यहाँहरुको साथ र सहयोगको अपेक्षा छ ।’

मिस्टर एण्ड मिस सिन्धुपाल्चोक विजेतालाई नगद सहित म्यूजिक भीडियो, छोटो चलचित्रमा अभिनयको अवसर प्रदान गरिने जनाईएको छ ।