८० फिटको बुद्ध मुर्ति शिलान्यास

भोटेनाम्लाङ । सिन्धुपाल्चोकको पाँचपोखरी थाङ्पाल गाउँपालिका– ७ भोटेनाम्लाङमा रहेको ठूलो ढुङ्गामा ८० फिटको बुद्ध मुर्ति निर्माण हुने भएको छ ।

शनिबार एक समारोहबीच नेकपा एमाले स्थायी कमिटि सदस्य एवम् पूर्व मन्त्री शेरबहादुर तामाङले बुद्ध मूर्ति निर्माणको शिलान्यास गरे । गाउँपालिका र नेपाल ललितकला प्रज्ञा प्रतिष्ठान, मुर्तिकला विभागको संयुक्त आयोजनामा सो मूर्ति स्थापना गरिन लागिएको हो ।

ठुलो ढुंगासहित पालिका भित्र रहेको पाँचपोखरी, हबेली, ड्रागन गुफा, नागिथाम डाँडा जस्ता पर्यटकीय स्थलहरुको प्रचार प्रसार राष्ट्रिय तथा अन्र्तराष्ट्रिय स्तरसम्म पुर्याउदै पर्यटकीय गन्तव्यको केन्द्र बनाउने उदेश्यका साथ बुद्ध मुर्ति निर्माण गर्न लागिएको गाउँपालिका अध्यक्ष टासी लामाले बताए ।

‌‌‌

देशको घुम्नलायक एक सय गन्तव्यभित्रको १६औँ स्थानमा पर्न सफल पाँचपोखरी कुण्डसहित विभिन्न पर्यटकीय स्थल रहेको पालिकाले पर्यटक आर्कषणको लागि पाहुना हाम्रो साथी अभियानसँगै होमस्टे व्यवसायलाई पनि प्रोत्साहन गर्दै पर्यटक हब बनाउने लक्ष्य राखिएकोे रहेको गाउँपालिकाका पर्यटन प्रर्वद्धन समितिका अध्यक्ष सुवास तामाङको भनाई छ ।