सहिदको सपना साकार पार्नेमा पार्टी दृढ छः सापकोटा

चौतारा । नेकपा (माओवादी केन्द्र) का केन्द्रिय सदस्य माधव सापकोटाले सहिदको सपना साकार पर्नेमा पार्टी दृढ रहेको जनाएका छन् ।

शहिद तथा बेपत्ता परिवारहरुको आँगनमै पुगेर भेटघाट गर्ने कार्यक्रम अनुरुप नेता सापकोटाले बलेफी गाउँपालिका– ६ मांखामा भएको एक कार्यक्रमलाई सम्बोधन गर्दै पार्टी सहि दिशामा हिँडिरहेको बताए । सो कार्यक्रममा सहिद लक्ष्मी पराजुली ‘निर्जला’, जीतबहादुर तामाङ, डोल्मा तामाङ र निलप्रसाद पराजुलीको परिवारलाई सम्मान गरिएको थियो ।

कार्यक्रममा सहिद परिवारका सदस्यहरुले पार्टीले सम्झदा आफूहरुलाई खुसी लागेको बताएका छन् । ‘हामी अहिलेसम्म कतै बिचलित भएनौं, पार्टीकै सिद्धान्तलाई पछ्याईरहेका छौं’, सहिद जीतबहादुर तामाङका छोरा एवम् सहिद डोल्मा तामाङको दाजु बाबु तामाङले भने– ‘हाम्रो परिवारले गरेको त्याग र बलिदानलाई सम्झेर पार्टीले गरेको सम्मान प्रति हामी धेरै खुसी छौं ।’

त्यस्तै सोमबार नै सापकोटासहितको टोलीले बलेफी गाउँपालिका– ४ फुल्पिङडाँडका शहिद परिवारहरुसँग भेटघाट गरेको छ । सहिद दीलबहादुर तामाङ, नारायण कार्की र बाबुकाजी ढुङ्गानाको परिवारसँग भेटघाट परी उनीहरुलाई सम्मान समेत गरिएको छ ।

सहिद, बेपत्ता परिवारको आंगनीमा भेटघाट कार्यक्रम अनुरुप नेकपा (माओवादी केन्द्र) का केन्द्रिय सदस्य सापकोटासहितको टोली सोमबार मध्यान्न जुगल गाउँपालिका– ५ बराम्चीका सहिद परिवारहरुसँग भेटघाट गर्न पुगेको थियो । सहिद पर्बत श्रेष्ठ, कृष्ण बहादुर तामाङ, सुर्य दोङ, लभ सिलवाल, कबिन्द्र थापा, सूर्यबहादुर श्रेष्ठ, सूर्यमाया श्रेष्ठको परिवारसँग भटघाट गरी उनीहरुलाई सम्मान गरिएको अखिल (क्रान्तिकारी) का जिल्ला नेता प्रदीप पराजुलीले जानकारी दिए ।

भेटघाट कार्यक्रममा नेकपा (माओवादी केन्द्र) का केन्द्रिय सदस्य सापकोटासहित बागमती प्रदेश सचिवालय सदस्य अमृता नेपाल, प्रदेश सदस्य प्रताप सिं तामाङ, प्रदेश सदस्य गंगा तामाङ, वाईसियल जिल्ला संयोजक चित्रबहादुर तामाङको टोली पुगेको थियो ।

फागुन १४ गतेबाट २१ गतेसम्म मनाईने सहिद सप्ताह अन्र्तगत नेकपा (माओवादी केन्द्र) सिन्धुपाल्चोकले जिल्लाभरका सहिदको घर घरमा पुगि भेटघाट र सम्मानको कार्यक्रम गरिरहेको छ ।