श्रीमतीलाई हत्या गरेको आरोपमा तामाङ पक्राउ

चौतारा । आफ्नै श्रीमतिलाई काठको दाउरा तथा ढुंगा प्रहार गरी हत्या गरेको आरोपमा प्रहरीले मेखबहादुर तामाङलाई पक्राउ गरेको छ ।

सिन्धुपाल्चोकको चौतारा साँगाचोकगढी नगरपालिका– १ स्याउलस्थित गुन्साटोलका तामाङलाई प्रहरीले पक्राउ गरेको हो । उनले चैत्र १५ गते साँझ ४६ वषिय श्रीमती सुकुमाया तामाङलाई काठको दाउरा तथा ढुंगाले टाउको, अनुहार तथा शरीरका विभिन्न भागमा प्रहार गरी गम्भीर घाईते बनाएका थिए ।

घाईते तामाङको उपचारको लागि चौतारा अस्पताल ल्याएकोमा चिकित्सकले मृत घोषणा गरेपछि घटनामा संलग्न श्रीमान मेखबहादुरलाई राति नै घटनास्थलबाट पक्राउ गरिएको जिल्ला प्रहरी कार्यालय सिन्धुपाल्चोकका सूचना अधिकारी दक्षकुमार बस्नेतले बताए ।

तामाङलाई सिन्धुपाल्चोक जिल्ला अदालतबाट दिन ७ को म्याद अनुमति लिई थप अनुसन्धान कार्य अगाडि बढाईएको उनले बताए । मृतकको शव पोष्टमार्टम पछि छोरालाई जातिय परम्परा अनुसार सदगदको लागि जिम्मा लगाईएको प्रहरीले जनाएको छ ।