प्राज्ञिक विद्यार्थी परिषदद्वारा शैक्षिक सामग्री वितरण

बाह्रविसे । प्राज्ञिक विद्यार्थी परिषद् नेपालले सिन्धुपाल्चोकको बाह्रबिसे नगरपालिका– ४ को शारदा माध्यमिक विद्यालयमा शैक्षिक सामग्री वितरण गरेको छ ।

परिषद्ले प्रति विद्यार्थी १ थान झोल, १ थान टोकी, १ थान र्यापिड इङ्लिस बुक, ५ थान अभ्यास पुस्तिका प्रदान गरेको छ । त्यस्तै विज्ञान तथा कक्षा १० को लागि इन्स्ट्रमेन्ट बक्स र विद्यालयको प्रयोजनको लागि ५ थान शब्दकोश समेत हस्तान्तरण गरिएको प्राज्ञिक विद्यार्थी परिषद्का राष्ट्रिय संगठन सचिव नारायणप्रसाद ढकालले जानकारी दिए ।

शैक्षिक सामग्री वितरण कार्यक्रमलाई सम्बोधन गर्दै बाह्रबिसे नगरपालिका प्रमुख बालकृष्ण बस्नेतले दातृनिकायको काम अनुकरणीय भएको र आफ्नो कार्यकालमा नगरले शिक्षा क्षेत्रमा दिनुपर्ने सबै सुविधा र काम–कारबाही सुरु भइसकेको बताए । उनले नगरमा कक्षा १२ सम्म निःशुल्क शिक्षा र ८ सम्म दिवा खाजाको व्यवस्था गरिएको बर्ता । नगरको शिक्षा क्षेत्रलाई अझै प्रभावकारी बनाउन आफु र नगरपालिका सदैव लागिरहने बताए ।

विद्यार्थीको शैक्षिक क्षेत्रमा योगदान पुर्याउने हेतुले शैक्षिक सामग्री सहयोग गरिएको बताउँदै राष्ट्रिय संगठन सचिव ढकालले निस्वार्थ रुपले विद्यार्थीहरुलाई सहयोग गर्ने परिषद्को मूख्य उद्देश्य रहेको भन्दै भूकम्प र कोरोना पीडितलाई पनि सहयोग गरेको सुनाए । उनले विद्यार्थीको समग्र व्यक्तित्व विकासको लागि काम गर्ने परिषद एक मात्र अर्गनाइजेशन भएको दाबी गरे । नेपाल भारत सनातनकालदेखि छिमेकी देश हुन भन्दै उनले भारतले शैक्षिक क्षेत्रमा नेपाललाई धेरै ठूलो सहयोग गर्दै आएको बताए ।

परिषद्का महासचिव छितराज न्यौपानेले नेपालका हिमाली भेगमा अध्ययनरत विद्यार्थीहरूको आवश्यकतालाई महसुस गरी व्याग कपी, पिक्स पुस्तक, जमेक्ट्री बक्स, नेपाली बृहत् शब्दकोश, टोपी लगायतका शैक्षिक सामग्रीहरू वितरणको सुरुवात शारदा मावीबाट गरिएको बताए । शैक्षिक सामग्री परिषद्को आग्रहलाई स्वीकार गरी भारतीय जनता र भारत सरकारको सहगोगबाट प्राप्त भएकोसमेत उनले बताए ।

कार्यक्रममा विद्यालयको प्रधानाध्यापक नीलप्रसाद सुवेदीले शैक्षिक सामग्री सहयोग गरेकोमा प्राज्ञिक विद्यार्थी परिषद्लाई धन्यवाद ब्यक्त गर्दै यस्ता सहयोगले विद्यालय र विद्यार्थी दुबैलाई सकरात्मक प्रभाव पर्ने बताए ।