समाजवादको आधारशीला सहकारीः सापकोटा

बलेफी । नेपाल कम्युनिष्ट पार्टी (माओवादी केन्द्र) का पोलिटब्यूरो सदस्य माधब सापकोटा ‘सुबोध’ले समाजवादको आधारशीला सहकारी भएको बताएका छन् ।

सिन्धुपाल्चोकको बलेफी गाँउपालिका– ४, बिन्जेलमा रहेको समाज सुधार महिला विकास बचत तथा ऋण सहकारी संस्था लिमिटेडको १४औं साधारण सभा तथा तीज विशेष कार्यक्रमलाई सम्बोधन गर्दै सापकोटाले ग्रामीण भेगको सुख दुःखको साथी सहकारी मार्फत समाजवाद ल्याउन सकिने बताए । सापकोटाले सहकारीले गर्दै आएको कामको प्रशंसा गर्दै सहकारीको भवन रङ्गरोगन र घेराबार सहित व्यवस्थित बनाउको लागि आफूले सकेको पहल गर्ने बताए । अहिले तीजमा समावेशिता देखिएको भन्दै नेता सापकोटाले महिलाहरु सधैं एकजुट भई समृद्ध समाज निर्माण लाग्नुपर्ने बताए ।

सो कार्यक्रममा नेपाल कम्युनिष्ट पार्टी (माओवादी केन्द्र) का केन्द्रीय सदस्य अमृता नेपालले संस्कार संस्कृतिको अनुसरण गर्दा अन्धविस्वासलाई हटाई राम्रो कुरा अनुसरण गर्नु पर्ने बताईन् । उनले तडक भडकरहित तीज पर्व मनाउन महिलाहरुलाई आग्रह गरिन् । त्यस्तै बलेफी गाँउपालिका अध्यक्ष गंगाबहादुर तामाङले आगामी बजेटमा सबै सेयरधनि महिलाहरुलाई एकै खाले पोषाक उपलब्ध गराउने प्रतिबद्धता व्यक्त गरे । उनले पालिकाले सहकारीलाई सदैव आवश्यक सहयोग गर्ने समेत बताए ।

२०६४ सालमा स्थापना भएको सहकारीमा हाल ५ सय ५ जना शेयर सदस्यहरु रहेका छन् । कार्यक्रममा उत्कृष्ट महिला बचत र बाल बचत कर्तालाई सम्मान समेत गरिएको थियो । कार्यक्रममा सहकारीको विभिन्न समूहमा रहेका महिलाहरु ले चेतना मूलक गीत, नृत्य प्रस्तुत गरेका थिए ।

सहकारीको अध्यक्ष देवकी पौडेलको अध्यक्षमा भएको सो कार्यक्रममा बलेफी गाँउपालिकाकी उपाध्यक्ष सरु लामा, जनप्रतिनिधीहरु, समाजसेवी, सेयर सदस्यहरु, सञ्चारकर्मी, स्थानीयलगायतको उपस्थिति थियो ।