म्याद गुज्रिएको अखाद्य बस्तु जफत

मुडे । जिल्ला बजार अनुगमन समिति सिन्धुपाल्चोकले म्याद गुज्रिएको अखाद्य बस्तु जफत गरेको छ ।

लिसंखुपाखर गाउँपालिकाको मुडे बजार र शिलढुङ्गा बजारमा गरिएको अनुगमनको क्रममा म्याद गुज्रिएको बिस्कुट, चाउचाउ, मसला, पानीपुरी, लिचीजुस, ओडोनिलजस्ता सामग्री जफत गरी नष्ट गरिएको अनुगमन समितिका संयोजक एवम् सहायक प्रमुख जिल्ला अधिकारी निराजन श्रेष्ठले जानकारी दिए । मुडे र शिलढुङ्गा बजारमा अनुगमन समितिले २२ वटा पसलमा अनुगमन गरेको थियो ।

अनुगमन समितिसहित, घरेलु कार्यालय, उद्योग वाणिज्य संघ, प्रहरी, जनप्रतिनिधि, सञ्चारकर्मीको टोलीले पसलहरुको अनुगमन गरेको थियो । अनुगमनको क्रममा म्याद गुज्रिएको तथा अखाद्य बस्तु फेला परेपछि अनुगमन समितिका संयोजक श्रेष्ठले पसलमा देख्ने गरी मूल्य सूची राख्न, बोर्ड राख्न, व्यवसाय नविकरण गर्न, मदिरा व्यवसाय दर्ता गर्न र व्यवसाय क्षेत्र वरपर सरसफाई गर्न निर्देशन दिए । उनले जिल्लाका सबै बजार क्षेत्रमा अनुगमनलाई तीव्र पारिएको समेत जनाए ।